Жылдағы дәстүрге сай, халықаралық қарттар күні мерекесі қарсаңында ауданның қоғамдық өміріне белсене ат салысып жүрген қазыналы қарияларға құрмет көрсетілді. Төлеби ауданының орталығында ұйымдастырылған шараға Төлеби ауданының әкімі Төлеген Телғараев, аудандық мәслихат депутаты Хабидулла Нышамбаев, “AMANAT” партиясы Төлеби аудандық филиалының атқарушы хатшысы Қуаныш Қансеитов қатысып, мемлекетіміздің дамуы жолында еңбек етіп жүрген ардагерлерге аудан әкімінің «Алғыс хаты» мен аудандық мәслихаттың Грамотасы, «AMANAT» партиясы мен аудандық ардагерлер кеңесінің «Алғыс хаттарын» табыс етті.
«Біркөлік» емдеу-сауықтыру кешені» ЖШС-нің директоры Ералы Мыңбаев демеушілік жасаған дастархан басында ең алдымен бабалар рухына құран бағышталды. Салтанатты іс-шара барысында ауданның абыз ақсақалдары өскелең ұрпаққа жақсы менен жаманның аражігін ажырататын өсиетті ақыл-кеңестерін айтты. Елдегі ұлтаралық татулық пен саяси тұрақтылықтың сақталуын, қайғысыз күннің түгемеуін тіледі.
— Мемлекетіміздің қалыптасу жолында еселі еңбегімен танылған аға буын өкілеріне алғысымды жеткізе отырып, Сіздердің ауданымыздың әлеуметтік-экономикалық дамуына, бейбітшілікті, қоғамдағы ұлтаралық және конфессияаралық келісімді нығайтуға қосқан ерекше үлестеріңізді атап өткім келеді. Өскелең ұрпақ үшін сіздер борышқа адалдықтың, Отанға деген сүйіспеншіліктің, жеңіске деген өшпес ерік-жігердің үлгісі болып келесіздер,- деді құттықтау сөзінде аудан әкімі Төлеген Тұртайұлы.
Мерекелік жиында аудандық Мәдениет үйінің қызметкерлері әсем әнімен көпшілікті тәнтті етті.
Сонымен бірге, Қазыналы қарттарды мерекелерімен Төлеби ауданының әкімі Төлеген Телғараев құттықтау жолдаған болатын: «Құрметті қариялар, ардақты ардагерлер, ақ жаулықты әжелер!
Сіздерді, жылдағы дәстүр бойынша атап өтілетін Қарттар күні мерекесімен шын жүректен құттықтаймын.
1990 жылы желтоқсан айының 15 күні БҰҰ Бас Ассамблеясы бұл күнді «Халықаралық қарттар күні» деп жариялаған болатын. Жыл сайын тұрақты түрде атап өтілетін мерекенің басты мақсаты — қазыналы қарияларымызға құрмет көрсету болып табылады. Мемлекетіміздің қалыптасу жолында еселі еңбегімен танылған аға буын өкілеріне алғысымды жеткізе отырып, Сіздердің ауданымыздың әлеуметтік-экономикалық дамуына, бейбітшілікті, қоғамдағы ұлтаралық және конфессияаралық келісімді нығайтуға қосқан ерекше үлестеріңізді атап өткім келеді. Өскелең ұрпақ үшін сіздер борышқа адалдықтың, Отанға деген сүйіспеншіліктің, жеңіске деген өшпес ерік-жігердің үлгісі болып келесіздер.
Қазақ – қашанда үлкенді құрметтеп, «Қарты бар ел – қазыналы ел» деп қариясын қадірлеген халық. Ардагерлердің аса құнды кеңестері мен ақыл парасатын, ғұмырлық ғибратын үлгі тұтып келеміз. Сіздердің өмірлік тәжірибелеріңіз бен ақыл-кеңестеріңіз, тәлім-тағылымдарыңыздың біз үшін орны бөлек.
Қария — ағып жатқан дария, телегей теңіз іспеттес. Сіздер көпті көрген тарихи шежіре және біз үшін даналықтың қайнар көзісіздер! Біз Сіздердің өнегелі еңбектеріңіз бен жетістіктеріңізді, барлық ізгі қасиеттеріңізді ерекше үлгі тұтамыз. Қай кезде де халқының тілеуін тілеп, жұртына қамқор болатын қарттарымыз аман болсын!
Қадірменді ардагерлер!
Біздің болашағымыз үшін жасаған адал еңбектеріңізге шын жүректен алғысымды білдіремін. Алланың берген жасын мазмұнды да мағыналы өткізе берулеріңізге тілектеспін. Жанұяларыңызға құт береке, дендеріңізге саулық, игілікті істеріңізге сәттілік тілеймін!», делінген құттықтауда.
