Келес ауданы әкімінің аппаратында Еңбек күніне орай дөңгелек үстел өтті. Аудан әкімінің орынбасары Даурен Сариев қатысқан келелі кездесуге әр салада абыройлы қызмет атқарып, өнегелі өмір жолымен өзгелерге үлгі болған еңбек ардагерлері, бүгінгі таңда еңбегімен еленіп жүрген үздік мамандар және жастар шақырылды. Алғы сөзді аудан әкімінің орынбасары алып, Еңбек күні мерекесінің мән-маңызына тоқталып, түрлі салада жемісті еңбек еткен ел ағаларына аудан әкімінің алғыс хатын табыстады.
-Сіздерді жыл сайынғы мереке — халқымыздың экономикалық және әлеуметтік саладағы жетістіктеріне арналған «Еңбек күнімен» құттықтаймын. Халқымызда «Адал еңбек – ердің досы» деген нақыл сөз бар. Кім адал еңбегінің арқасында ел құрметіне бөленсе, сол адамның өмірі ғибрат. Бұл мереке адал еңбегімен еліміздің дамуы мен өркендеуіне өлшеусіз үлес қосып жүрген баршаңызға деген құрметтің көрінісі. Қажыр-қайраты мен күш-жігерін Келес ауданының өркендеуіне арнаған еңбек ардагерлеріне, аға буынның тәлімгерлік жолын жалғап ерен еңбектің үлгісін көрсетіп жүрген орта буын жерлестерімізге зор ризашылығымды білдіремін, — деді Даурен Сариев.
Басқосуда әр салада кәсіби біліктілік пен мамандыққа адалдықтың шынайы үлгісін көрсеткен ел ағалары өздерінің өмір жолынан сыр шертер әңгімелерін айтып, жастарды талмай еңбек етуге шақырды. Шара соңы Ә.Кенжеев атындағы Келес аудандық мәдениет үйінің өнерпаздары дайындаған концерттік бағдарламасына ұласып, көпшілікке шад-шадыман көңіл-күй сыйлады.
