Сарыағаш ауданының әкімі Арман Абдуллаев Жылға ауылдық округі тұрғындарымен кездесті. Ашық форматта өткен есептік кездесудің басым бөлігі тұрғындардың көкейкесті сұрақтарына жауап беруге арналды. Осыған дейінгі кездесуде көтерілген мәселелердің қаншалықты орындалғанын халық алдында баяндап, алдағы жоспарларымен бөлісті. Аудан басшысы одан кейін тұрғындардың жекелеген сұрақтарына жауап беріп, мәселелердің шешілу жолдары мен жүйелерін жақсылап түсіндірді.
-Бүгін өздеріңізбен арнайы жүздесіп, маңызды мәселелерді талқылау үшін келіп отырмын. Ең алдымен атқарылған жұмыстарлы саралап, жоспарларды нақтылайтын боламыз. Ағымдағы жылы Қарақалпақ елді мекеніндегі дәрігерлік амбулатория нысанының құрылысы аяқталып, пайдалануға берілді. Сонымен қатар, Жылға, Нұрауыл, Шайхана елді мекендерінің ауыз су жүйелерінің құрылыс жұмыстары басталды. Біздің басты мақсат-халықтың табысын арттыру, қордаланған мәселелерін шешу, әрбір елді мекенін дамыту арқылы тұрғындардың өмір сүруіне қолайлы жағдай жасау біз үшін өте маңызды, -деді аудан басшысы.
Кездесуде ауыл тұрғындары тарапынан аудан басшысына таза ауыз сумен қамтамасыз ету, жарықтандыру, жайылым жер, тозығы жеткен электр бағаналарын жаңарту, дәрігерлік амбулатория салу мәселелері бойынша сұрақтар қойылып, заң аясында тиісті жауаптар берілді.
Кездесуден кейін аудан басшысы тұрғындарды жеке мәселелерімен қабылдап, өтініштерін тыңдап, заң аясында жауап берді. Арман Абдуллаев тұрғындар тарапынан көтерілген әрбір мәселе назарға алынып, кезең-кезеңімен шешілу жолдары қарастырылып, алдағы уақытта заңға сәйкес тиісті жұмыстар атқарылатынын жеткізді.
