Қазақ халқы — батыл, ержүрек, жаудан таусалмайтын көшпенділердің ұрпағы. Атпен егіз туған ғұнның, жебемен құралайды көзге атқан сақтың, төрткүл дүниеге танылған түркінің, ер мен үзеңгіні ойлап тапқан көшпенді жұрттың жұрнағымыз.
Жерінің шетіне жау шапса, түкті жүрек ұлдары найзасы мен семсерін, батыл қыздарына дейін садағы мен қорамсабын асына аттанған бабалар ізіміз. Қай заман да болса да Отаны үшін отқа түсіп, ел үшін соғысқа аттанған батырларымыз аз емес. Осы ержүректілігімізді біз Екінші дүниежүзілік соғыста да көрсете білдік. Дивизия басқарған Бауыржан, партизан Қасым, Рейхстагқа ту тіккен Рахымжан, пулеметші Мәншүк, мерген Әлия, ұшқыш Хиуаз… Тізім жалғаса береді.
Ресми деректерде соғыс жылдары кеңес әскері қатарына 1 миллион 200 мың қазақстандық шақырылған деседі. Оның 601 мыңы туған жерге оралған жоқ. Қаншама отбасының жүрегіне мәңгілікке жара салды. Ол балалық шағы соғыс жылдарынан кейінгі ауыр кезеңге тап келген біздің де бастан өтті. Қиын кезеңдерді ел болып бірге еңсердік.
Екінші дүниежүзілік соғысқа Түркістан өңірінен 140 мыңнан астам адам аттанды. Бұл соғыста жанқиярлық ерлігі үшін 51 азаматқа Кеңес Одағының батыры атағы берілсе, 8 жерлесіміз «Даңқ» орденінің иегері атанды. Жаужүрек қайсарлығы үшін мыңдаған ардагерлеріміз түрлі орден, медальдармен марапатталды. Мұның барлығы қазақ халқының ержүректілігің көрінісі. Осы батыр бабаларымыздың ерлігін келешек ұрпақ ешуақытта ұмытпауы керек.
Бүгінгі таңда өңірімізде 14 Ұлы Отан соғысының ардагері тұрады. Жалпы, биыл 4438 ардагерге Жеңіс мерекесінің құрметіне бір реттік материалдық көмек төлеу үшін аудандық, қалалық бюджет есебінен 175,5 млн. теңге қаржы бөлінді. ҰОС ардагерлеріне 1,5 млн. теңгеден үлестірілсе, 4400-ден астам тыл еңбеккері мен қаза болған жауынгердің жесірлеріне және басқа да санаттардағы ардагерлерге қаржылай көмек қарастырылды.
Биыл Жеңістің 78 жылдығы. Қазақтың ақиық ақыны Мұқағали Мақатаев айтатынындай, соғыс ардагерлерінің саны күн емес, тіпті сағат сайын азайып келеді. Бастысы, елімізді соғыстан сақтасын, көк аспанымызда тек бейбітшіліктің туы желбіресін.
Жеңісбек МӘУЛЕНҚҰЛОВ,
Түркістан облыстық ардагерлер кеңесінің төрағасы
