Бүгінгі таңда әр жерде бір бой көтеріп қалатын еңбек дауларын шешудің ең бір тиімді жолы – еңбек ұжымдарының мүддесін қорғай алатын ықпалға ие қуатты бастауыш кәсіподақ ұйымдарын қалыптастыру екені сөзсіз. Бұл мәселе төңірегіндегі тұшымды ой-пікірлер «Қалың қалай, бастауыш ұйым?» акциясы аясында Түркістан облысында онлайн режімде өткен кәсіподақ ұйымдарының жиынында айтылды.
Заңда жұмыс берушінің де, жұмыскердің де құқығы анық айтылған. Десек те, құқығы тапталып, артық іске жегіліп жатқандар, кімге жүгінеді? Кімнен араша сұрайды? Осы орайда «Түркістан облысы кәсіподақтар орталығы» аумақтық кәсіподақтар бірлестігінің ұйымдастыруымен ZOOM платформасы арқылы онлайн кездесу өтті. Оған «Түркістан облысы кәсіподақтар орталығы» аумақтық кәсіподақтар бірлестігінің төрағасы Бердіғали Өмірәлі, кәсіподақ мүшелері арасынан жаңадан сайланған мәслихат депутаттары және кәсіподақ активі қатысты.
Онлайн форматта өткен кездесу барысында қаралған басты тақырыптардың бірі — еңбек адамының құқығы, мүдделерінің қорғалуы. Кәсіподақтар еңбек заңдылықтарын сақтау, еңбек қауіпсіздігі секілді мәселелерді басты назарда ұстайды. Кездесуде бұл мәселелер де талқыланды.
Кездесу барысында сөз алған төраға Бердіғали Өмірәлі ең алдымен сайлау науқанында жеңіске жетіп жаңадан сайланған депуаттарды жеңістерімен құттықтап, еңбек адамының әлеуметтік және еңбек қатынастары саласындағы заңды құқықтары мен мүдделерін қорғау жолында өз құзыреті шегінде маслихатта кәсіподақтардың әр бастамаларына қолдау білдіре отырып, алдағы уақытта мемлекетіміздің игілігі үшін бірлесіп жұмыс жасауға шақырды.
Сонымен қатар қатысушылар Кәсіподақтар Федерациясының «Кәсіподақтар — Әділдік үшін» — Біз әлеуметтік мемлекетке 15 қадам сайлауалды тұғырнамасының негізінде өзара іс-қимыл перспективаларын талқылады.
Жиын соңында қатысушылар бірлесіп жұмыс істеуге ниетті екенін білдірді.
