Түркістан облысы Шардара ауданында облыстың белсенді ұзақ өмір сүру орталықтарындағы зейнеткерлер мен мүгедектігі бар азаматтардың қатысуымен үстел теннисінен жарыс өтті, деп хабарлайды Түркістан облысының Өңірлік коммуникациялар қызметіне сілтеме жасаған 4tagan.kz ақпараттық агенттігі.
Аталған сайыс Шардара ауданында орналасқан “Қасиет” әлеуметтік қызмет көрсету орталығының қолдауымен ұйымдастырылды. Жарысқа Келес, Мақтаарал, Шардара, Жетісай және Шардара аудандарынан келген зейнеткерлер мен мүгедектігі бар азаматтар қатысты.
Тартысты өткен ойынның қорытындысы бойынша Келес ауданының «Қазыналы қария-Тең қоғам» әлеуметтік қызметтер көрсету орталығының зейнеткерлері бас жүлдені иеленді. Ал, Мақтарал ауданының «Замандастар және Ten Qogam» командасы ІІ орын, Жетісай ауданының «Асыл Қазына Тең қоғам» командасы ІІІ орынды қанжығасына байлап, диплом және кубоктармен марапатталды.
Сонымен қатар, «Қасиет» командасы мен «Аялы алақан және қамқор» командасы белсене қатысқаны үшін марапатталды. Келес ауданының «Қазыналы қария — Тең қоғам» әлеуметтік қызметтер көрсету орталығының директоры Айгерім Тулепбергенова жүлделі орын алған зейнеткерлерді арнайы құттықтап, сыйлықтар табыстады.
