Түркістан облысы Кентау қаласы әкімінің орынбасары Ақнұр Байболова аналарға «Алтын алқа» және «Күміс алқа» төсбелгілерін табыс етті. Аталған марапатты 8 ардақты ана иеленді. Оның 3-уі «Алтын алқа», 5-і «Күміс алқа» иегері, деп хабарлайды облыс әкімінің баспасөз қызметіне сілтеме жасаған 4tagan.kz ақпараттық агенттігі.
Ардақты аналарға құрмет көрсетілген жиында А. Байболова аналарды құттықтап, ізгі тілегін білдірді.
— Халқымыздың демографиялық әлеуетін арттырып жатқандарыңызға алғыс білдіреміз. Еліміздің алтын діңгегі болып, ізгі дәстүрлер сабақтастығын жалғап жүре беріңіздер, — деді ол.
Жыл сайын жеті және одан артық баланы дүниеге әкелген аналарға «Алтын алқа» наградасы, ал алты баланы дүниеге әкелген аналарымызға «Күміс алқа» беріледі.
Жалпы, Кентау қаласында 1547 көпбалалы ана бар. Оның ішінде «Алтын алқа» иегерлері — 459, «Күміс алқа» иегерлері — 1001. Сондай-ақ «Батыр ана» 30, «Ардақты ана» 1,2 дәрежелі 57 ана бар.
