Адамды шыңға жетелеп, бар мақсатына уақытында жеткізетін қасиеті – еңбекқорлық. Таңның атысынан күннің батысына дейін маңдай тері жіпсігенше жұмыс жасап, нәпақа табу – әр адамның өмірлік міндеті. Бірақ, бойында тасыған талабы мен талантын тұншықтырып, төсектің төңірегінен шыға алмай жүрген жандар қаншама?!
Жалпы, Түркістан облысында Келес ауданында кәсіпкерлік саласы қарқынды дамып келеді, деп хабарлайды Түркістан облысының Өңірлік коммуникациялар қызметіне сілтеме жасаған 4tagan.kz ақпараттық агенттігі.
Осы ретте өткен жылдың қорытындысымен Келес ауданында тіркелген кәсіпкерлік субьектілерінің саны 10 453-ке жетіп, оның ішінде белсенді жұмыс істеп тұрған кәсіпкерлер саны 10 307-ні құрады. Кәсібінен нәсіп тапқандардың қатарында Ошақты ауылдық округіндегі кәсіпкер Бекмұрат Қарабеков те бар.
— Бұл кәсіпті бастауыма тікелей көршілерім сеп болды. Алғашқыда олар қоршау жасап беруімді сұранып келген еді. Кейіннен ізденіп, кәсіп ретінде қолдана бастадық. Бастапқыда қатты сымтемірлерді трактор арқылы түзулеп, қол күшін жұмсасақ, бүгінде мемлекет тарапынан берілетін жеңілдетілген несие алып, жаңа технологияларды енгіздік. Сұраныс көп, — деген Бекмұрат Рахманбердіұлы алдағы уақытта кәсібін кеңейтуді жоспарлап отыр.
Кәсіпкердің сөзінше, торлы қоршаудың бағасы да құрылыс дүкендеріне қарағанда төмен екен. Қазіргі таңда қоршаудың метрі 500-700 теңге аралығында. Күніне 700-800 метр істеп шығаратын аппаратын мемлекеттік бағдарлама аясында төмен пайызбен несие алып, 5 млн теңгеге сатып алған.
Кәсіпкер алдағы уақытта қазіргі қолданыстағы құрылғысының санын арттырып, кәсібін кеңтейтуді жоспарлауда.
