Түркістан қаласында үйде қызмет алатын балалар үшін арнайы мерекелік кеш ұйымдастырылды. Думанды кеште балалар ән мен биден шашу шашып, өз өнерлерін ортаға салды. Салтанатты шараға қала әкімі Нұрбол Тұрашбеков қатысып, бүлдіршіндер мен олардың ата-аналарын жаңа жыл мерекесімен құттықтады.
«Тағдыр сынына мойымай, алға ұмтылған періштелерімізге өмірге құштарлығы үшін, үміттері мен армандары үшін, шынайы күлкілері үшін зор құрметпен алғысымды білдіремін. Балаларға қамқорлық тек «Балалар жылымен» шектелмейді. Біз алдағы уақытта да Сіздермен талай игі шараларда бас қосатын боламыз, — деді қала әкімі.
Қазіргі таңда Түркістан қаласында денсаулығына қатысты 1316 бала тіркелген. Оның ішінде 113 балаға Жұмыспен қамту және әлеуметтік бағдарламалар бөлімінің арнайы мамандары үйде қызмет көрсетеді. Сонымен қатар, қалада ерекше балаларға қамқорлық жүйелі түрде жүзеге асып келеді.
Айта кетсек, Түркістан қалалық жұмыспен қамту және әлеуметтік бағдарламалар бөлімінің ұйымдастыруымен бірнеше рет «Мейірімді жүрек» акциясы өтіп, оған 213 бала қатысқан. Сондай-ақ, қалалық ерікті Әсел Бимырзаеваның «Армандар орындалады» жобасына жыл ішінде 70 бала тартылып, демеушілер тарапынан олардың арман-тілектері орындалды.
Түркістан облысының Өңірлік коммуникациялар қызметі
