Жаңа жыл мерекесі қарсаңында Ордабасы ауданының әкімі Нұрбек Бадырақов “Шапағат” орталығында болып, сонда түрлі қызмет алып жатқан мүмкіндігі шектеулі балаларды сонда арнайы құттықтап барды.
— Құрметті балалар! Қадірменді тәрбиешілер мен ата-аналар!
Сіздерді Жаңа жыл мерекесімен шын жүректен құттықтаймын!
Өздеріңізге белгілі, мемлекет балалардың жан-жақты дамуына қолдаулар көрсетіп келеді. Атап айтар болсақ, сапалы білім алуына, бос уақытын тиімді пайдалануына, қоғамдық-саяси өмірге белсенді араласуына және кедергісіз орта қалыптасуына басымдық берілуде.
Бүгінгі таңда ауданымызда 5 мыңнан аса мүгедектігі бар адам тұрып жатса, олардың 823-і балалар. Оның ішінде 118 балаға 10 ауыл окургі бойынша үйде арнаулы қызметтер көрсетіледі.
Одан бөлек, ағымдағы жылдың шілде айында «Шапағат» әлеуметтік қызметтер көрсету орталығы ашылды. Соның құрамындағы «Тең қоғам» орталығында бір жарым жастан 18 жасқа дейінгі мүмкіндігі шектеулі 28 балаға күнделікті қызмет көрсетіліп келеді. Одан бөлек мұнда сондай санаттағы 614 жанға да түрлі қызметтер ұсынылуда.
«Тең қоғамда» күніге кемінде 12-13 адам қызмет алады. Орталықта өзгелермен тең қоғамда өмір сүру үшін барлық жағдай жасалған. Яғни ,тренажерлар, тұз шахтасы, бильярд, теннис, шахмат, кітапхана, жаттығу залдары бар. Сондай-ақ осында келуші балаларға да, ересектерге де білікті мамандар қызмет жасауда. Осының барлығы мемлекетіміздің Сіздерге жасап жатқан қамқорлығы деп білгейсіздер.
Құрметті бүлдіршіндер!
Ата-аналар мен тәрбиешілер!
Мереке қарсаңында әр баланың өзін ерекше сезінуі және ертегіге сенуі өте маңызды. Біз үшін ең үлкен сыйлық — бақытты бала көздері және олардың қуанышқа толы шын күлкісі. Игі істер балалардың жүрегінде от жағып, жаңа жылдық сиқырдың бұл сәттері олардың жадында сақталады.
Мерекелеріңіз тағы да құтты болсын! Өмірдің берген сынағына мойынсынбай, өзгелермен тең болуға тырысып-бағып жатырсыздар. Ол үшін шынайы ризашылығымды және алғысымды білдіремін. Дендеріңізге саулық, отбасыларыңызға амандық тілеймін!
Мерекелік шарада орталықта қызмет алушы балалар өз өнерлерін паш етті. Ән айтты, би биледі. Аудан басшысы балаларға сыйлықтар табыс етіп, ең кішкентай бүлдіршіннің тұсауын кесті.
Аудан әкімінің баспасөз қызметі
