Ордабасы ауданында жылдағы дәстүр бойынша аудан әкімінің бүлдіршіндерге арналған жаңа жылдық шыршасы өтті.
Балалардың қуанышына аудан әкімі Нұрбек Бадырақов ортақтасып, бүлдіршіндерді Жаңа жыл мерекесімен құттықтады.
Құрметті ұстаздар қауымы!
Құрметті оқушылар!
Сіздерді барлық адамзаттың асыға күтетін Жаңа жыл мерекесімен шын жүректен құттықтаймын!
Жаңа жыл – әлемдегі қуанышқа толы ең ғажайып мерекелердің бірі. Әсіресе, бұл күнді балалар мен жасөспірімдер асыға күтеді.
Өздеріңізге белгілі, ауданымызда 70 мектеп бар. Оларда 37 мыңнан астам оқушы білім алып жатыр. 4,5 мыңға тарта мұғалім дәріс беруде. Одан бөлек 6 мектептің құрылысы жүргізілуде. Бұйыртса олардың 3-уі жақын аралықта ашылып, пайдалануға берілетін болады.
Атқырылып жатқан игі істің барлығы сіздердің жақсы оқып, ата-аналарыңыз бен мұғалімдеріңіздің сенімін ақтап, білімдеріңізбен еліміздің, ауданымыздың атын шығару үшін, Отанымыздың патриоты болу үшін жасалынып жатыр.
Жалпы, ауданымыз жаңа жылды толағай жетістіктермен қарсы алып жатыр. Атап айтсақ, “Достық” жалпы орта мектебінің оқушысы Гүлнұр Мұхтарова Түркияның Алания қаласында менталды арифметикадан ұйымдастырылған халықаралық олимпиадада 1-ші орын алды. Сондай-ақ, «Бәйтерек» жалпы орта мектебінің 9-шы сынып оқушысы Айзада Сейдуалы Алматы қаласында өткен халықаралық «Атадан мұра» байқауында 1-ші орын иеленді. Одан бөлек, «Елбасы медалі» — жастарды кешенді дамытуға бағытталған ұлттық деңгейдегі бағдарлама аясында 3 оқушымыз күміс медаль алса, 10 оқушымыз қола медальға қол жеткізді.
Сонымен қатар, өнер саласында да түрлі жарыстарда, байқауларда топ жарып жүрген оқушы жастарымыз да бар. Олардың қатарында Диас Айнабекті, Дастан Октамовты мақтанышпен айтуға болады. Оқушылардан құралған «Балдаурен» домбырашылар тобының, «Інжу» триосының, «Бой стар» тобының және «Мұрагер» ансамбілінің жеткен жетістіктері де ауданымыздың, ұстаздар мен ата-аналардың абыройын асқақтатты.
Ауданымыздың оқушылары облыстық деңгейде өткізілген түрлі байқауларда топ жарып жүргені қуантады.
Міне, осынау жетістіктердің барлығы білімге, өнерге, спортқа деген қызығушылығы жоғары оқушы жастарымыз бен олардың білікті тәрбиешілірінің, мұғалімдерінің арқасы. Ол үшін шынайы алғысымды білдіремін!
Құрметті оқушылар!
Ата-аналар, ұстаздар!
Мереке тағы да құтты болсын! Оқуда озат болуларыңызға тілектеспін!
Білім саласын жетілдіруде етіп жатқан еңбектеріңіз қашанда жемісті болсын!
Отбасыларыңызға бақыт тілеймін!
Мерекелік шарада Аяз ата мен Ақшақарды көтеріңкі көңіл күймен қарсы алған бүлдіршіндер ән-жырдан шашу шашып, би билеп, өнерлерін ортаға салды.
Жасыл шырша жанына жиналған ертегі кейіпкерлері ғажайыпқа толы қойылымдар көрсетті.
Мерекелік шара соңында балаларға сыйлықтар үлестірілді.
Аудан әкімінің баспасөз қызметі
