Түркістан облысының құрылғанына 4 жылдан асты. Жұртшылық, әсіресе, Түркістан қаласын абаттандыру және жасыл қалаға айналдыру бағытындағы жұмыстарға дән риза. Облыс орталығы әлеуметтік-экономикалық және архитектуралық орталыққа ғана емес, жасыл желегі жайқалған, экологиясы жақсарған шаһарға айналып келеді. Көгалдандыру жұмыстары тоқтаусыз жалғасып жатыр. Түркістанда жергілікті климатқа тез бейімделетін көшеттер мен көпжылдық шөптер, гүлдер гүлдейтін шөптерді өсіруге мән берілген. Атап айтқанда, шаһарда көлеңке беретін әрі тез өсетін қарағай мен акация ағаштары, үлкенжапырақты шегіршін, үйеңкі отырғызылды.
Облыс орталығы Түркістан қаласын гүлдендіру, жасыл желекке айналдыру, оны күтіп-баптау міндетін бірнеше мекеме өз мойындарына алған. Сондай мекемелердің бірі – «Жасыл Түркістан» коммуналдық мемлекеттік мекемесі. Мұнда 200-ге жуық жұмысшы шаһардың жасыл желегін күтіп-баптау үшін тер төгеді.
Қалалы жерде тұратын әрбіріміз арнайы киім киген көше сыпырушыларды, бағбандарды көріп қалып жатамыз. Жайлы, таза ортаны қалыптастыруда еңбегі орасан осындай азаматтардың жұмысы көп жағдайда назардан тыс қалып жатады. Біз бүгін әңгіме еткелі отырған кейіпкеріміз Марат Сұлтанбеков біраз жылдан бері Түркістан қаласының жасыл желегін күтіп-баптауда еселі еңбектің үлгісін танытып келеді.
– «Жасыл Түркістан» мекемесіне жұмысқа кіргеніме 2 жылдан асты. Қазіргі таңда Қожа Ахмет Ясауи мешітінің аумағында бағбанмын. Осы айналадағы талдарға, гүлдерге, жасыл желекке күтім жасаймыз. Сонымен қатар осы маңдағы тазалық жұмыстары да бізге жүктелген. Қазіргі таңда кесенеде жөндеу жұмыстары жүріп жатыр. Қолымыз босаған уақытта Алланың разылығы үшін ол жұмыстарға да араласамыз, – дейді Марат аға.
Оның айтуынша, жұмыстың ең қиын кезеңі шілденің аптап ыстығы мен көктемнің басына тура келеді екен. Себебі, шілдеде күн қатты ысып, шымды күйдіріп жібереді. Ал, ол уақытта шымды суаруға болмайды екен. Қатты ысып тұрған шымды суарса, ол бірден сарғайып кетеді. Сосын қыстан шыққан өсімдікті суарудың да өзіндік тәртібі бар көрінеді.
– Күзгі уақытта ағаштарға көбірек су береміз. Себебі, қар түскенде берген суымыз ағаш тамырына мұз боп қатып, қыс бойы ылғалданып тұрады. Бұл талдардың қыстан аман шығуына сеп болады. Қазіргі таңда қураған талдарды кесіп, түптерін қопсытып жатырмыз. Қысқа дайындық қазірден басталып кетті, – дейді бағбан.
Қожа Ахмет Ясауи атындағы мешіттің айналасында алма ағаштары көптеп өсірілуде. Одан бөлек сәндік талдар да бар. Марат Сұлтанбековтен бөлек тағы 5 адам осы аумақтағы көгалдандыру жұмыстарына жауапты.
Жалпы, «Жасыл Түркістан» мекемесінде қала аумағына жауапты 6 бригада жұмыс істейді. Олардың әрқайсысында 5-10 жұмысшыдан бар. Әр бригада өзіне міндеттелген аумақтағы көгалдандыру, тазалық ісіне жауап береді.
– Соңғы уақыттары қаламызда көркіне көз тоймайтын зәулім ғимараттар бой көтерді. Осыған қарап түркістандықтар арасында қала мәдениеті де қалыптасып келе жатыр. Десек те, көпшілік орындарда тазалық сақтауды білмейтін азаматтар әлі де аз емес. Әрине, бұл жерде біріншіден нәпақа табу, отбасын асырау мақсатында жұмыс істеп жүрміз. Алайда, таң азаннан қара кешке дейінгі төккен тердің, еңбектің бағаланғанын қалаймыз. Қаланы таза ұстау жалғыз біздің міндетіміз емес қой. Осыны түсінбейтіндер де бар, – дейді Марат Сұлтанбеков.
Түркістан қаласының «Жасыл белдеуінде» жеміс ағаштары да өсірілуде. Бұл жұмыстарға агрономдар, мамандар, кәсіпкерлер, қала тұрғындары атсалысуда. Осы ретте қаланы 32 секторға бөліп, аудан, қала әкімдіктері мен басқармаларды жауапты етіп, жұмысты жүйелеу өз жемісін беру үстінде. Қала әкімі әр секторды аралап, қаланың абаттандыру және көгалдандыру жұмыстарын тұрақты түрде тексеріп тұрады. Барлық секторда жұмыс қарқыны жоғары. Қала күн сайын қоқыстан тазартылып, гүлзарлар, саябақтар жайнай түскен.
Ең бастысы, Түркістанға келетін туристер қатары артты. Әсем қала қонақтарға жайлы да қызықты демалыс сыйлауда.
Расында да қаланы, қоршаған ортаны таза ұстау жалғыз «Жасыл Түркістанның» немесе осы тектес тазалық мекемелерінің міндеті емес. Сол ортада өмір сүріп жатқан әрбір тұрғынның айнымас борышы болуы керек. Сонда тазалық мәдениеті деген тақырыпқа қайта оралмайтын да шығармыз?!
Е.АЙНАБЕКОВ.
