ҚР Экология, геология және табиғи ресурстар министрі Серікқали Брекешев Түркістан облысының тұрғындарымен кездесті. Жиынға облыс әкімінің орынбасары Ермен Кенжеханұлы, еңбек ұжымдарының өкілдері, табиғат жанашырлары, сондай-ақ жергілікті тұрғындар қатысты.
Министр тұрғындар алдында жалпы республика және өңір бойынша жүргізіліп жатқан жұмыстар туралы баяндап, алдағы кезеңге арналған жоспарларымен бөлісті.
Тұрғындармен кездесуде ескірген кәріз тазарту құрылыстары, кей жерлерде тіпті олардың болмауы, қалдықтарды басқару және қайта өңдеу саласы, атмосфералық ауаның сапасы, су саласын, орман және балық шаруашылығын дамыту секілді өзекті мәселелер айтылды.
Түркістан облысының экологиялық проблемаларын шешу үшін Жол картасында 21 іс-шара қарастырылып, бүгінде 9-ы орындалған. Оның ішінде «Түркістан Жылу» МҚК-да қазандығы газға ауыстырылып, жаңғырту жұмыстары жүргізілген. Сонымен қатар, Түркістан қаласы мен облыс аудандарында жеке секторды газдандыру мен жасыл желектерге инвентаризация жүргізілген.
Бұдан бөлек, министрлік стихиялық қоқыс үйінділерінің пайда болу мәселесін шешу үшін бірқатар жүйелі шаралар қабылдады, олардың саны облыс бойынша жылына 400 бірліктен асады. Кешенді жұмыс жүргізу үшін министр әкімдікке коммуналдық қалдықтарды басқару жөніндегі бағдарламаны әзірлеуді және бекітуді ұсынды.
Су саласын дамыту бойынша министр су шаруашылығындағы негізгі проблемалар ретінде су шаруашылығы объектілерінің тозуының жоғары деңгейі және судың үлкен шығыны болып табылатынын атап өтті. Бұл ретте, қазіргі уақытта су шаруашылығы инфрақұрылымын салу мен реконструкциялау және суару арналарын цифрландыру жұмыстары жүргізілуде.
«Шардара су қоймасы бөгетін қайта құру және сейсмикалық тұрақтылығын арттыру бойынша үлкен жоба іске асырылуда, ол Түркістан және Қызылорда облыстарының 260 мың халқы бар 231 АЕМ тұрғындарын су басу қаупінен сақтауға және оларды кепілді суармалы сумен қамтамасыз етуге мүмкіндік береді», — деді С.Брекешев.
Сырдария өзеніндегі Көксарай контрреттегішінің бөгетіне және басқа да бірнеше гидротехникалық құрылыстарға да қайта құру жүргізіледі. Мұның бәрі 48,2 мың га суармалы жерді жақсартуға, сумен қамтамасыз етуге кепілдік болады және қосымша 1,5 мың жұмыс орнын құруға мүмкіндік береді.
Сонымен қатар, министр орман және балық шаруашылығын дамыту мәселелерін де тілге тиек етіп, Түркістан облысы балық өсіру бойынша көшбасшы екенін атап өтті. Бағдарламаға сәйкес, биыл өңір бойынша 6,1 мың тонна балық өсіру жоспарланған. Жыл басынан бері 4,1 мың тонна тауарлық балық өсірілді. Биыл сазан, форель және африкалық сом өсіретін 4 тоған балық фермасы құрылды.
«Облыс әкімдігінен балық шаруашылығы саласындағы басқа инвестициялық жобалардың іске асырылуын ерекше бақылауға алуды және қажетті жәрдем көрсетуді, оның ішінде субсидиялауға қаражат бөлуді сұраймын», — деп қорытындылады С.Брекешев.
Есеп беру кездесуінен кейін министр азаматтарды жеке қабылдап, сұрақтар мен өтініштердің назарға алынатынын жеткізді.
Сапар аясында министр су шаруашылығы саласында атқарған елеулі еңбектері үшін «Қазсушар” РМК Түркістан филиалы Мақтарал өндірістік бөлімшесінің бас инженері Қ. Сарбасов пен «Қазсушар” РМК Қызылорда филиалының бөлім басшысы Б. Таймановты марапаттады және жиналған қауымға алғысын білдіріп, еңбектеріне табыс тіледі.
Түркістан облысының Өңірлік коммуникациялар қызметі
