Бұл туралы Ордабасы ауданының әкімі Нұрбек Бадырақов шұбарсулықтармен кезекті кездесуі кезінде айтты.
Ауыл орталығындағы мәдениет үйінде өткен кездесуде аудан басшысы алдымен жыл басынан бері атқарылған жұмыстарды және алдағы жылдың жоспарларын баяндады. Сондай-ақ, шұбарсулықтармен болған кездесудегі ұсыныстардың, талап-тілектердің орындалу барысы айтылды.
Кездесуде белгілі болғандай, Шұбарсуды ауызсумен қамтудың бірінші кезеңі 2021 жылы аяқталып, 600-ден астам абонент қамтылған. Ал, қалған төрт кезең бойынша биыл жұмыстар жалғасып, 2023 жылы толық аяқталмақ. Яғни, келесі жылы 13 мыңнан астам абонент қамтылатын болады.
Сондай-ақ, Шұбарсуды табиғи газбен қамту жұмыстары 4 кезеңге бөлінген. Барлығы 2023 жылға өтпелі. Келесі жылы 15 мыңнан астам абонент газбен қамтылады деп жоспарлануда.
Сонымен қатар, кездесуде тұрғындар тарапынан ортақ жайылым, ретсіз сауда, аялдама сынды мәселелер көтерілді. Өз кезегінде аудан әкімі әрбір мәселенің шешу жолдарын заң аясында қарастыруды тиісті сала мамандарына тапсырды. Жиын аясында әкім ауыл тұрғындарын жеке мәселелері бойынша қабылдады.
Айта кетсек, бүгінде Шұбарсу ауылдық округінде 40 мыңнан астам халық тұрады.
