Бүгін Сауран ауданының әкімі Ғ.Рысбеков 2022 жылдың 9 айы бойынша атқарылған жұмыстарымен және алдағы уақытта жүзеге асырылатын жұмыс жоспарлары туралы бекітілген кестеге сәйкес, Ескі Иқан ауылдық округінің тұрғындарымен кездесті.
Мемлекет басшысы Қасым-Жомарт Тоқаев «Барлық деңгейдегі әкімдер жыл бойы халықпен кездесулер өткізсін. Олардың барысында халықты толғандыратын әлеуметтік мәселелерге баса назар аудара отырып, Қазақстанды жаңғыртудың жаңа бағдарының негізгі бағыттары туралы хабардар етсін және проблемалық мәселелерді шешудің жолдары мен мерзімдерін түсіндірсін» деп тапсырма берген болатын.
Кездесу барысында алдымен аудан әкімі жеке қабылдау өткізді. Оған ауыл тұрғыны Қ.Шерметов «Ирригациялық жүйелерді жетілдіру жобасы — 2» шеңберінде атқарылып жатқан жұмыстардың сапасын қадағалауды және шаруа қожалықтарға күздік бидай егу үшін «Арыс-Түркістан» каналынан су келуін қамтамасыз етуді сұрады. Ал, ауыл тұрғындары Х.Шарапов шаруа қожалықтар мақта бағасын көтеруін талап етуін сұраса, М.Юлдашев Ескі Иқан ауылдық округін ауыз су және табиғи газбен қамтуын және тұрғын үй салу мақсатында жер беруді сұрады. Жеке қабылдауға келген тұрғындардың өтінішін тыңдаған аудан әкімі мәселелерді мұқиыт тыңдап, оның шешу жолдары туралы ауыл тұрғындарға түсіндіріп өтті.
Бұдан соң әдеттегідей аудан әкімі Ғани Құрмашұлы аудан көлемінде атқарылып жатқан жұмыстар туралы және оның ішінде Ескі Иқан ауылдық округі бойынша кеңінен тоқталып өтті. Еркін форматта өткен кездесу барысында тұрғындар тарапынан бірнеше мәселелер көтеріліп, аудан әкімі жауап берді. Ауылдық округ тұрғындары тарапынан аудан әкімінің жұмысын оң бағалап, алдағы атқарылап жұмыстарына сәттілік тілесті.
