Арыс қаласының әкімі Гүлжан Құрманбекованың кезекті халықпен кездесуі бүгін Монтайтас ауылдық округіне қатысты Шағыр елді мекенінде өтті. Жиынға Арыс ауданының прокуроры Талғат Сейдуалиев пен қалалық кәсіподақ ұйымының жетекшісі Жебел Достанов және әкімдіктегі жауапты сала мамандары қатысып, көпшіліктің сұрақ-сауалдарына нақты жауаптар берілді.
Кездесу алдында қала әкімі Шағыр елді мекеніндегі мектеп ауласында жеке кәсіпкер салып жатқан спорт алаңшасының құрылысымен танысты. Содан кейін мектептің акт залында ауыл тұрғындарымен ашық пікір алмасып, іске асырылған және жоспарланған жұмыстар жайында аз-кем баяндады.
«Ауыл тұрғындарының ұсынысына сәйкес, Шағыр мен Ақтас, Қабылсай елді мекеніндегі бірнеше көшеге жақын күндері тас төселеді. Ал Атамекен елді мекеніндегі 10 көшеге жөндеу жұмыстарын жүргізу үшін «Ауыл – ел бесігі» жобасына ұсыныс берілді. Жұмыстар 2023 жылы жүргізілетін болады», – деді Гүлжан Мамытқызы.
Сонымен қатар, басқосуда тұрғындар тарапынан электр қуатының әлсіздігі мен желілер мен бағаналардың ескіргені, Арысқа қатынайтын қоғамдық көліктің ауыл ішімен жүруі, интернет байланысының нашарлығы сынды әлеуметтік мәселелер айтылды.
Ал қала әкімі мен саланың жауапты мамандары тарапынан ешбір сұрақ ескерусіз қалмады. Сондай-ақ, күрмеуі қиын мәселелердің шешілу жолдары тұрғындар пікірі назарға алына отырып, қызу талқыланды.
