Кентау қаласының әкімі Жандос Тасов қалаға қарасты Ащысай ауыл тұрғындарымен кездесті. Жиын барысында қала басшысы ауылда атқарылатын жұмыстарға тоқталып, халықты мазалап жүрген сауалдарға жауап берді.
Ащысай ауылын газбен қамту мақсатында құрылыс жұмыстарының жобалық-сметалық құжаттамалары әзірленіп жатқаны айтылды. Сонымен қатар, ауылды 24 сағат ауыз сумен қамту бойынша жүргізіліп жатқан құрылыс жұмыстарына тоқталды. Кездесу барысында ауыз су мәселесіне қатысты тұрғындар бірқатар ұсыныстарын білдірді. Шаһар басшысы өз кезегінде жұршылықтың тілегі жерде қалмай, жөндеу жұмыстары кезінде ескерілетінін жеткізді.
Сондай-ақ тұрғындар тарапынан ауылдағы жарық бағаналарын жаңарту мәселесі, газ балондарын тасмалдау жағы, жас кәсіпкерлерге қолдау көрсету секілді бірқатар мәселер көтерді. Осының негізінде жағдайды зерделеу және шаралар қабылдау үшін жоспар жасалып, бақылауға алынатыны айтылды.
Кездесуден соң қала әкімі Жандос Тасов ауыл тұрғындарын жеке мәселелері бойынша қабылдады. Қабылдауға кірген 7 тұрғын жер, тұрғын үй, кәсіпкерлік салалары бойынша өз өтініштерін атап өтті. Мәселерін тыңдаған қала басшысы сала басшыларына бірқатар тапсырмалар берді.
