Бүгін Кентау қаласының әкімі Жандос Тасовтың төрағалығымен кезекті апталық жиын өтті. Күн тәртібінде кәсіпкерлік және ауылшаруашылық саласындағы индикаторлардың орындалуы, қаладағы өрт гидранттарының жұмыс барысы, қала және ауылдардағы маңдайша, жарнама тақтайшалардың «ҚР Тіл туралы» Заңының талаптарына сәйкестендіру жұмыстарының барысы, 109 байланыс орталығына келіп түскен арыз-шағымдардың орындалуы, әлеуметтік желі арқылы жүргізілген мониторинг жұмысы, облыс және қала әкімдерінің хаттамалық тапсырмаларының орындалуы барысы жайында баяндалды.
Қала басшысы баяндамашыларды тыңдап, бірқатар сала басшыларына жұмыстарының жүйелі орындалмауы жайында сынға алды. Ескертулер берілді.
«Әр басшы өз саласына жанашырлықпен әрі жауапкершілікпен қарауы қажет. Сол кезде жұмыс жүйелі жүретін болады. Тұрғындармен кері байланыс орнатарда, берер жауаптарыңда нақты әрі нәтижелі болуы керек» деді.
Жыл қорытындысы жақындап келе жатқандықтан, іске асырылу қажет жұмыстар мен көрсеткіштер өз деңгейінде орындалмаса жауапты маманынан бастап басшысына дейін шара көрілетін болды. Бұл бойынша аппарат қызметкерлеріне бақылауға алуды тапсырды. Жиынға қала әкімінің орынбасарлары, бөлім және мекем басшылары, ауыл әкімдері қатысты.
