Бүгін Кентау қаласының әкімі Жандос Тасов қалаға қарасты «Саяжай» және «Шоқтас» елді-мекеннің тұрғындарымен кездесіп, көпшіліктің толғандырған мәселелерін тыңдады.
Аталмыш ауылдың бір бөлігі Кентау қаласына, екінші бөлігі Сауран ауданына қарасты болып келеді. Алайда, осы сәтке дейін ауыл тұрғындары арасында су мәселесі шешімін таппай келген. Кезінде кооператив болып құрылған елді-мекен тұрғындары сол аймақтағы ауыз суды өздері қолданыста ұстап келген. Алайда, су құбырлары бүгінгі таңда тозығы жетіп, жөндеу жұмыстарын қажет етеді. Қала әкімі су құбырының басты бөліктерін бақылап, толықтай «Ащысай Су» МКК қарауына алуды сала басшыларына тапсырды.
Енді қажетті құжаттарды рәсімдеген соң, елді-мекеннің толықтай ауыз су жүйесі «Ащысай Су» МКК-на өтетін болады. Мекеме тарапынан қажетті жұмыстар атқарылып, су өлшегіш құралдары орналастырылады. Сол уақытта ауыл толықтай ауыз сумен қамтылатын болады. Көптен бергі түйінді мәселенің шешіміне ауыл тұрғындары бір ауыздан келісімдерін берді.
Жалпы, аталмыш елді-мекен тұрғындарының басым бөлігі егіншаруашылығымен айналысады. Тұрғындар қалаға қатынайтын қоғамдық көліктің мәселесін айтып, бірқатар сауалдар көтерді. Қала басшысы бұл бойынша тиісті басшыларға шешу бойынша тапсырма берді.
