МЕРДІГЕР КОМПАНИЯНЫҢ ЖАУАПСЫЗДЫҒЫНАН ЖҰМЫС ЖҮЙЕЛІ ЖҮРМЕЙ ТҰР

Бүгінгі таңда Келес ауданында құрылыс жұмыстары қарқынды жүргізіліп жатыр. Мемлекет қолдауының нәтижесінде балалардың сапалы білім алуына барлық мүмкіндік қарастырылуда. Аудан аумағында білім ошақтарын салу, жөндеуді қажет етіп келген мектептерге көңіл бөлу мәселесі шешімін табуда.
Дегенмен кейбір мердігер компаниялардың жауапсыздығынан жұмыс жүйелі жүрмей тұр. Қазіргі кезде Ошақты ауылдық округі аумағында №46 Абай атындағы жалпы орта мектепке 300 оқушыға арналған нысанын кеңейту жұмысы жүргізілуде. Мемлекет тарапынан тиісті қаражат бөлініп, барлық мүмкіндік қарастырылса да мұндағы жұмыс негізгі кестеден кешігіп отыр. Келес ауданының әкімі Ақментай Есбаев аталған құрылыс нысанына барып, жұмыс барысын көзден кешірді.
«Осыған дейін ауқымды жұмыстың жүзеге асуы тиіс екенін, бұл ретте жұмысшы күшін көбейтуді, құрылыс жұмысын кестеге сай сапалы әрі ширақ жүргізуі аса маңызды екенін ескерткен болатынмын. Міне 2 ай өтті, аса бір біткен тірлікті көріп тұрған жоқпын. Екі айдан бері тым болмаса жұмыстың жартысы да бітпеген. Енді жыл соңына дейін жаңа оқу ғимаратын пайдалануға беру керексіздер. Бұндай жұмыспен нәтижеге қол жеткізе алмайсыздар», — деген аудан басшысы мердігер мекеменің учаске бастығына бірқатар сын ескерпелер беріп, жұмыс барысы туралы тапсырыс беруші облыстық салалық басқармаға мәлімет дайындауды тиісті бөлім басшысына тапсырды.
Айта кетейік, Ошақты ауылдық округіндегі №46 Абай атындағы жалпы орта мектепке 300 оқушыға арналған нысанын кеңейту жұмысы ағымдағы жылдың желтоқсан айының бірінші жұлдызында аяқталуы тиіс. Құрылыс жұмыстарына тапсырыс беруші мекеме – облыстық құрылыс басқармасы болып табылады.