КЕЛЕС: ӨНДІРІЛГЕН АУМАҚТЫҚ ЖАЛПЫ ӨНІМ КӨЛЕМІ 49,0 МЛРД ТЕҢГЕНІ ҚҰРАДЫ

Келес ауданында өндірілген аумақтық жалпы өнім көлемі 49,0 млрд теңгені құрап, өткен жылдың тиісті кезеңімен салыстырғанда 8,2 млрд теңгеге артты. Оның ішінде, ауылшаруашылығы саласының үлесі 62,6% құрап отыр. Кәсіпкерлік саласы бойынша ірі 3 жоба іске асырылуы жоспарлануда. Олар, ауыл шаруашылығы өнімдерін сақтайтын қойма, ет өңдеу, шұжық өнімдерін өндіру зауытының құрылысы және Халықаралық өнеркәсіптік кооперация орталығының құрылысы. Бұл туралы Келес ауданының әкімі Ақментай Есбаев аудандық мәслихаттың кезекті он сегізінші сессиясында атап өтті.
Кезекті сессияда он бір мәселе қаралып, соның ішінде аудан әкімінің ағымдағы жылы атқарылған жұмыстары мен алдағы тұрған міндеттері туралы есебі тыңдалды. Аудан басшысы өз баяндамасында инвестиция, ауылшаруашылығы, инфрақұрылым, білім, спорт, құрылыс салаларында атқарылған жұмыстарға тоқталып, алдағы жоспарларымен бөлісті. Атап айтсақ аудандағы маңызды саланың бірі жол саласына тоқталатын болсақ, аудан аумағында жалпыға ортақ пайдаланымдағы автомобиль жолдарының ұзындығы 1172,3 шақырымды құрайды.
Аудандық маңызы бар автомобиль жолдарының ұзындығы 122,5 шақырым болса, оның 100,6 шақырымы жақсы және қанағатанарлық жағдайда. Жылдың қорытындысымен аталған көрсеткіш 90,2%-ды құрайды. Елді мекендердегі ішкі көшелер ұзындығы 711,1 шақырым болса, оның 331,0 шақырымы орта жөндеуден өткен, яғни ішкі көшелердің 46,5% қанағаттанарлық жағдайда. Жыл қорытындысымен 60,3 пайызға немесе 428,6 шақырымға жеткізу көзделуде. Жалпы жол саласында ағымдағы жылы жалпы ұзындығы 126,1 шақырымды құрайтын 70 көшеге асфальт және шағал төсеу жұмыстары жүргізілуде.