Шымкент қаласының тұрғыны, кәсіпкер Ғани Нұржігітов бес балалы жалғызбасты анаға Темірлан ауылынан 8 миллион 100 мың теңгеге баспана сыйлады.
Жаңа үйдің кілтін арнайы келіп, өзі табыстаған кәсіпкер азамат қасиетті Рамазан айында азаматтарды жақсылық жасауға, сауабы мол игі бастамаларға қатысуға шақырды.
Екі қыз, үш ұлды тәрбиелеп отырған Мереке Үсенбаева қуанышын жасыра алмай, атымтай жомарт азаматқа ризашылығын білдірді.
«Шыны керек, біз мұндайды күтпеген едік. Енді ондай бақ әркімде бола бермейді ғой. Алла Тағаланың қалауымен баспаналы болып отырғаныма қуаныштымын. Барша ұйымдастырушыларға алғысым шексіз», деді жаңа баспананың иесі.
Сонымен қатар, кәсіпкер жалғызбасты ананың отбасына тұрмыстық техника сыйға тартты.
Игі шарада Көктөбе ауылындағы Н.Нысанбайұлы атындағы жалпы орта мектебінің 2010 жылғы түлектері көпбалалы ананың қуанышына ортақтасып келген көпшілікке ауызашар берді.
Ордабасы ауданы әкімдігінің баспасөз қызметі
