3 тонна ешкі сүтін өндіруге және 24 тонна сүт өңдеуге қауқарлы «Ордабасы ешкі сүт өнімдері» өндірістік кооперативі бүгінде табысты жұмыс жүргізіп келеді. Аталған шаруашылық аймақтағы ешкі сүтін өндіру мен өңдеуді дамытудың маңызды орталығына айналып отыр.
Кәсіпорынның жұмысымен танысқан облыс әкімі Жансейіт Түймебаев ешкі сүтінің адам денсаулығына пайдасы зор екенін атап өтіп, атқарылып жатқан жұмыстарға оң бағасын берді. Сонымен қатар, бұл бағытты одан әрі дамытудың жолдары талқыланды.
Кооператив төрағасы Жеңіс Тоғызақбаевтың айтуынша, өндірістік кешеннің алғашқы кезеңінде сауын цехы, сүт өңдеу зауыты және жемшөп дайындайтын ғимарат толық іске қосылған. Қазіргі таңда шаруашылықта Нидерландтан әкелінген заанен тұқымды ешкілер өсірілуде. Жобаның үш кезеңнен тұратын даму жоспары бар, жалпы инвестициялық құны 1 млрд 829 млн теңгені құрайды.
Бүгінде кооперативте 500 бас ешкі бар, ал жоспар толық жүзеге асқан жағдайда олардың саны 6 мың басқа дейін жетпек. Өнімділігі жоғары заанен тұқымы жылына егіз төл беріп, 100 аналықтан орта есеппен 200-ге жуық лақ алынады. Бұл тұқымның басты артықшылығы – сүт өнімділігінің жоғары болуы. Егер отандық ешкілер күніне 1,5–2 литр сүт берсе, заанен ешкілері тәулігіне 5–6 литрге дейін сүт береді.
Қазіргі уақытта кәсіпорында ешкі сүтінен айран, қаймақ, құрт, сүзбе және йогурт өндірілуде. Ешкілер тәулігіне екі рет сауылады, ал сүттің бір литрі 500 теңгеден саудалануда. Алдағы уақытта кәсіпорын Италияның заманауи технологиялық жабдықтарымен толық жарақтандырылып, сауын және сүт өңдеу үдерісі автоматтандырылмақ. Соның нәтижесінде ірімшік пен моцарелла өндіру қолға алынбақ.
Ешкі сүтінің анемия, тағамдық аллергия, туберкулез, асқазан-ішек жолдары аурулары, диабет секілді дерттердің алдын алуда және ағзаның иммундық жүйесін нығайтуда пайдасы зор. Сонымен қатар, оның құрамында кальций, магний, фосфор, марганец, мыс және А, В1, С, D дәрумендері мол.
Облыс әкімі Ордабасы ауданына жұмыс сапары барысында «Байдәулет» өндірістік жылыжай кешенінің де жұмысымен танысты. Қазіргі таңда жылыжай кешені 2,5 гектар аумақта қияр мен қызанақ өсірумен айналысып келеді. Мұнда 9 адам тұрақты жұмыспен қамтылған, жылына 60 тоннаға жуық өнім өндіріледі. Жобаның жалпы құны 15 млн теңге.
Шаруашылық басшылығы алдағы уақытта өндіріс көлемін 700 тоннаға дейін арттырып, дайын өнімді Алматы мен Қарағанды қалаларына жөнелтуді жоспарлап отыр.
Өңір басшысы аудан басшыларына жылыжай шаруашылығын дамыту бойынша нақты тапсырмалар беріп, заманауи технологияларды кеңінен қолданудың маңызын атап өтті.
— Оңтүстік өңірі ауыл шаруашылығын дамытуға өте қолайлы. Осы мүмкіндікті тиімді пайдаланып, жылыжай шаруашылығын дамытсақ, өнім көлемі де, сапасы да арта түседі, — деді Жансейіт Түймебаев.
