Ордабасы ауданының ауыл шаруашылығын дамытудың маңызды факторларының бірі – суармалы жерлерді тиімді пайдалану. Суармалы жерлер өнімділікті арттырып қана қоймай, ауыл шаруашылығы өнімдерінің сапасын жақсартуға, мол өнім алуға және жер ресурстарын ұтымды пайдалануға мүмкіндік береді.
Аудандағы жалпы суармалы жер көлемі 34,4 мың гектарды құрайды. Суармалы жерлердің тиімді пайдалануы үшін әр жыл сайын күрделі және механикалық жұмыстар жүргізіледі. 2025 жылы көктемгі дала жұмыстары мен күзгі жиын-терім науқанына 370 агроқұрылым төрағаларына 6,2 мың тонна жеңілдетілген жанармай бөлінді. Оның 4,3 мың тоннасы көктемгі дала жұмыстарына, 1,9 мың тоннасы күзгі жиын-терім жұмыстарға пайдаланылды.
Сонымен қатар, егістік жерлерді тыңайтқыштармен қамтамасыз ету мақсатында 14,9 мың тонна органикалық және минералды тыңайтқыштар қолданылды. Бұл шаралар өнім көлемін арттыруға және топырақ құнарлылығын сақтау мақсатында жүргізілді.
Аудан шаруалары заманауи суармалы технологияларды белсенді пайдаланып келеді. Су үнемдеу жүйелерін енгізу арқылы 2025 жылы 73 шаруашылық 1 595 гектар жерге тамшылатып және жабырлатып суғару әдістерін қолданды. Мысалы, Жеңіс ауыл округінен «ПК Дала» АӨК 650 гектар жерге тамшылатып суғару тәсілімен мақта дақылын егіп, гектарына 45 центнер өнім жинады. Су үнемдеу технологиялары тек суды үнемдеп қана қоймай, мол және сапалы өнім алуға кепіл береді.
Сондай-ақ, аудандағы суармалы жерлерді жақсарту үшін каналдарға күрделі жөндеу жұмыстары жүргізілуде. Жалпы құны 9,5 млрд теңге болатын 9 каналдың күрделі жөндеу жұмыстары жүзеге асырылуда. Жөндеуден кейін ЛБК және Р-11-С каналдары пайдалануға берілді, ал «Қараспан» магистралды каналы аяқталуға жақын. Бұл шаралар суармалы жерлердің тиімділігін арттырып, ауыл шаруашылығы өнімдерінің көлемі мен сапасын тұрақтандыруға бағытталған.
Ордабасы ауданының суармалы жерлерді дамытудағы кешенді шаралары ауыл шаруашылығын тұрақты қамтамасыз етуге, өнімділікті арттыруға және ауыл тұрғындарының әлеуметтік әл-ауқатын көтеруге үлес қосады.
