Ордабасы ауданының аграрлық саласының дамуы, әсіресе егін шаруашылығы, ауыл экономикасының басты тірегі болып табылады. 2025 жылы аудан көлемінде 71,2 мың гектар жерге түрлі ауылшаруашылық дақылдары орналастырылды. Олардың ішінде масақты дақылдар – 30,1 мың га, дәнді жүгері – 7,0 мың га, көкөніс – 3,5 мың га, картоп – 357 га, майлы дақылдар – 5,4 мың га, мақта – 7,2 мың га, бақша – 1,5 мың га, мал азықтық дақылдар – 16,1 мың га болды.
Жиналған өнім көлемі жалпы 391,8 мың тоннаны құрады. Оның ішінде масақты дақылдар – 41,3 мың тн, көкөніс – 91,1 мың тн, картоп – 7,4 мың тн, майлы дақылдар – 4,5 мың тн, бақша – 35,3 мың тн, жүгері – 76,7 мың тн, мақта – 22,5 мың тн, мал азықтық дақылдар – 112,7 мың тн. Бұл көрсеткіштер Ордабасы ауданының аграрлық әлеуетінің жоғары екенін және ауыл шаруашылығы өнімдерін тұрақты жеткізу мүмкіндігін дәлелдейді.
Егістік алқаптардың тиімділігін арттыруда бірнеше негізгі бағыттар жүзеге асырылды:
-
Жеңілдетілген жанармай бөлу: Көктемгі дала жұмыстары мен күзгі жиын-терім науқанына 370 агроқұрылым төрағаларына 6,2 мың тонна жеңілдетілген жанармай берілді. Оның 4,3 мың тоннасы көктемгі далалық жұмыстарға, 1,9 мың тоннасы күзгі жиын-терім жұмыстарына бағытталды.
-
Минералды және органикалық тыңайтқыштар қолдану: 14,9 мың тонна тыңайтқыш егістік жерлерді баптау және өңдеу үшін пайдаланылды, бұл дақылдардың өнімділігін арттыруға септігін тигізді.
-
Заманауи техника енгізу: Аудан шаруалары 168 бірлік жаңа техниканы сатып алып, жоспар толық орындалды. Жаңа техниканың қолданылуы егістік алқаптарды уақытылы өңдеуге, өнімділікті арттыруға мүмкіндік берді.
Сонымен қатар, егістік жерлерді суармалы сумен қамтамасыз ету маңызды шара ретінде жалғасуда. Ордабасы ауданында 9 каналға күрделі жөндеу жұмыстары жүргізіліп, суару тиімділігін арттыру мақсатында су үнемдеу технологиялары енгізілуде. 2025 жылы 73 шаруа қожалығы 1 595 гектар жерге тамшылатып және жабырлатып суғару әдісін қолданды.
Инвестициялар да егістік алқаптарды дамытуда маңызды рөл атқарады. 2025 жылы ауыл шаруашылығына салынған инвестициялар көлемі 11,4 млрд теңгені құрап, жоспардың 87,6%-ы орындалды. Бұл көрсеткіш ауыл шаруашылығы саласының тұрақты дамуына және өнім көлемін арттыруға мүмкіндік береді.
Қорытындылай келе, Ордабасы ауданының егістік алқаптарын дамыту бағытында жүргізілген кешенді шаралар – заманауи техника, тыңайтқыштар, суармалы жүйелер мен инвестициялар – ауылшаруашылығы өнімділігін арттыруға, экономикалық тұрақтылықты қамтамасыз етуге және ауыл тұрғындарының әл-ауқатын көтеруге бағытталған нақты қадам болып табылады.
