Қазығұрт ауданындағы №11 бітіруші колледжде түлектерге арналған диплом табыстау салтанатты шарасы өтті.
Аталмыш іс-шараға Қазығұрт ауданы әкімінің орынбасары Нұрсұлтан Медеуов арнайы қатысып, колледж түлектерін өмірлік маңызды белестерімен құттықтап, “Сіздер — еліміздің болашағысыздар. Бүгінгі алған білімдеріңіз ертеңгі күннің берік іргетасына айналады. Қай салада қызмет етсеңіздер де, адалдық пен еңбекқорлықты серік етіп, туған жеріміздің дамуына өз үлестерін қосады деп сенеміз,” — деді.
Салтанатты шара барысында колледж директоры мен ұстаздар құрамы да сөз сөйлеп, студенттерге жылы лебіздерін арнады. Студенттер өз кезегінде ұстаздарына алғыстарын білдіріп, болашаққа сеніммен қадам басатындарын жеткізді.
Дипломдарын қолдарына алған түлектер үшін бұл күн — тек оқу орнымен қоштасу ғана емес, үлкен өмірге жасаған алғашқы қадамы ретінде есте қалмақ. Олар түрлі мамандықтар бойынша білім алып, енді аудан мен ел экономикасының дамуына үлес қосуға дайын екендіктерін білдірді.
Айта кетейік, биылғы жылы 6 түрлі мамандық бойынша 210 студент түлеп ұшты. Олардың қатарында техникалық, қызмет көрсету, ауыл шаруашылығы сынды бағыттар қамтылған.
Сонымен қатар, түлектер үшін үлкен мүмкіндік те ұсынылды. Аудандық “Мансап” орталығының ұйымдастыруымен “Бос жұмыс орындары” жәрмеңкесі өтті. Жәрмеңке аясында кәсіби маман атанған жастар жолдама алу арқылы жұмысқа орналасу мүмкіндігіне ие болды. Бұл – жас мамандар үшін еңбек нарығына тікелей жол ашатын нақты мүмкіндік.
