Бүгін бұқаралық ақпарат құралдары қызметкерлерінің кәсіби мерекесіне орай Жетісай ауданының әкімі Серік Үсенұлы Мамытов Жетісай ауданындағы телеарна, басылымдар мен ақпараттық сайттардың журналистерін, сала ардагерлерін құттықтап, өңірдің медиа кеңістігін дамытуға қосқан үлестерін ерекше атап өтті.
«Аудандық бұқаралық ақпарат құралдары әрдайым жоғары жауапкершілікпен және кәсіпқойлықпен ерекшеленеді. Аймақта 1 телеарна, 5 мерзімдік басылым және көптеген ақпараттық портал редакциясы бүгінде заман көшінен қалмай, жаңа медианы меңгеріп, елдікті сақтау, азаттықты баянды ету жолында абыройлы қызмет атқарып келеді. Елді игі іске жұмылдырып, берекені арттырып, татулықты нығайтуда билік пен халық арасында алтын көпір болып жүрген бұқаралық ақпарат құралдарының рөлін қашанда жоғары бағалаймыз. Сіздерге еселі еңбектеріңіз үшін үлкен алғысымды білдіре отырып, мықты денсаулық, отбасыларыңызға амандық, шығармашылық табыс пен шалқар шабыт тілеймін» деді Серік Үсенұлы.
Аталмыш шараға аудандық мәслихат төрағасы Медет Қасымов пен «AMANAT» партиясы Жетісай аудандық филиалының төрағасы Асқар Қайназаров, ауданның медиа кеңістігінде өзіндік орны бар ардагер қаламгерлер мен жаңадан қадам басып келе жатқан жастар қатысты. Журналистиканың маңыздылығына тоқталып, жиналғандарды кәсіби мерекелерімен құттықтады.
Салтанатты шара барысында аудандық мәдениет үйі өнерпаздарының концерттік бағдарламасы ұсынылып, жиылған көпшілікке мерекелік көңіл-күй сыйлады.
