Кентау қаласы мен Сауран ауданы әкімдігінің ұйымдастыруымен, екі өңір жастарының басын қосқан «Ынтымағы жарасқан жастар» атты тағылымды кездесу өтті.
Шараның басты мақсаты – екі өңірдің жастары арасындағы ынтымақ пен достықты арттыру, ортақ тарих пен мәдени тамырды дәріптеу, салауатты өмір салтын насихаттау болды.
Кездесуге Облыстық қоғамдық даму басқармасы басшысының орынбасары Нұрсұлтан Сейітжанов, Кентау қаласы әкімінің орынбасары Ақнұр Байболова, Сауран ауданы әкімінің орынбасары Серік Садибаев, Кентау қаласы прокурорының орынбасары Бекжан Балқыбеков, Сауран ауданының прокуроры Алмаз Асылбеков, екі өңірдің зиялы қауым өкілдері мен жастар қатысты.
Жиын барысында, Кентау мен Сауран – тарихы тамырлас, тағдыры үндес өңір екені айтылып, бірлігі бекем елдің ғана болашағы жарқын болатыны сөз болды. Аға буын жастарға ақ батасын беріп, үлкен үміт артты.
Кездесу аясында жастар арасында спорттық жарыстар ұйымдастырылып, жеңімпаздар арнайы дипломдармен және сыйлықтармен марапатталды.
Осындай шаралар – жас ұрпақтың бойына патриоттық сезім, елге деген сүйіспеншілік пен жауапкершілікті дарытудың жарқын үлгісі.
