Түркістан облысы қоғамдық даму басқармасы “Жастар ресурстық орталығы” КММ-нің ұйымдастыруымен Түркістан облысы, Созақ ауданындағы «Жұмбақ тас» этно-лагерінде өтіп жатқан «JasSAQ» республикалық этно-реалити жобасы аясында қошқар көтеру сайысы жоғары деңгейде ұйымдастырылды.
Сайыстың мақсаты – ұлттық спорт элементтерін дәріптеу, жастардың физикалық дайындығы мен төзімділігін арттыру, сондай-ақ күш-жігер мен намыс сынды қасиеттерді ұштау.
Бұл сайыста шынайы қошқардың орнына арнайы дайындалған салмақты қап пайдаланылды. Қатысушылар 6 командаға бөлініп, белгіленген уақыт ішінде аталған салмақты құралды мүмкіндігінше көп рет көтеріп, күш сынасты.
Сайыс табиғи ортада өтті. Әділқазылар әр қатысушының техникалық дұрыс көтеруіне, тепе-теңдікті сақтауына және жалпы қауіпсіздік талаптарын орындауына ерекше назар аударды.
Жарыс барысында жастардың бойындағы күш, шыдамдылық және жеңіске деген жігері айқын көрінді. Бұл сайыс – бабалар мұрасынан шабыт алған, қазіргі заманға бейімделген ұлттық спорттық тартыстың көрінісі болды.
Командалар бір-бірін қолдап, әділ әрі достық рухтағы сайысты қамтамасыз етті. Қатысушылардың көрсеткіштері арнайы хаттамаға тіркеліп, жалпы командалық ұпайға қосылды.
Қорытынды нәтиже басқа сайыстармен бірге есептеліп, жобаның жабылу рәсімінде үздік қатысушылар марапатталады. Барлық қатысушыларға мадақтамалар мен ынталандыру сыйлықтары табысталатын болады.
