Кентау қалалық ішкі саясат бөлімінің ұйымдастыруымен «Алаяқтық, құқықбұзушылықтың алдын алу» бойынша Ащысай ауылында кездесу өтті.
Интернет алаяқтықтарға алданып қалмаудың бір жолы, пластик карталардың мәліметтерін, кодтарды және құпия сөздерді ешкімге хабарламауға, белгісіз әрі тексерілмеген сайттар арқылы алдын ала төлем жүргізбеуге, күмәнді мәліметтер бойынша ақша аударымдарын жүзеге асырмауға, ұялы телефон мен компьютерге белгісіз қосымшаларды орнатпауға, кез келген сілтеме бойынша өтпеуге, спам хабарламаларға сенбеуге заңгер Абуова Аида өзінің тәжірибесімен бөлісті.
Егер интернет алаяқтары сізге хабарласып «Сіз жеңімпаз атандыңыз, Сізге арнайы сыйлығымыз бар немесе ақша ұтысы бар, құжаттың көшірмесін жіберіңіз» деген жағдайда бірден сасқалақтап жеке мәліметтеріңізбен бөліспей сабыр сақтап, болып жатқан жағдайдың анық қанығына көз жеткізуге — психилог Закирбаева Құрбанай өз кеңесін берді.
Кездесу соңында Ащысай ауылының Қоғамдық кеңесінің мүшесі Бабажанов Темірхан, бүгінгі таңда елімізде «оңай табысқа кенелемін» деп бар жиған-тергенін күмәнді қаржылық ұйымдарға салып, қолма-қол немесе интернет желісі арқылы қаржысынан айырылып жатқан жерлестеріміздің аз емес екенін айта отырып, ауыл тұрғындарына қаржылық сауаттылықтарын арттыруға ақыл кеңесін айтты.
