Көпшілікті алаңдатып отырған «суицид» деп аталатын осы дерттің, еліміздің болашағы деп санаған жас буын өкілдерін жағалауы — елді алаңдатарлық жай.
Бұрын «суицид» жасы ұлғайған, балаларынан қайыр болмай, қараусыз қалған немесе аурудан әбден қажыған үлкен кісілердің арасында көбірек кездесетін. Соңғы кездері оның жасарып бара жатқандығы — көңіл қынжылтатын жағдай. Өз-өзіне қол жұмсау, әсіресе, өтпелі кезеңдегі жасөспірімдер арасында белең алады.
Өмір болған соң адамның ішкі жан дүниесінде үлкен күйзелістер болмай тұрмайды. Осындай қауіпті кезеңдерде олардың жан дүниесін түсініп, адамды тығырықтан шығар жол сілтейтін жақыны болуы керек-ақ. Бұлай дейтініміз, бүгіндері көптеген ата-ана күнделікті күйбең тірлікпен жүріп, баласында қандай проблемалардың туындағанын, көңіл күйі қандай екендігін білмейді, оған арнайы уақыт бөле алмайды, тіпті бас ауыртпайтындары да кезігеді. Осындайда балалар ішкі күйзелісін ешкімге айта алмай, булығып, тығырықтан шығар жол таба алмай, онымен тек өзі ғана арпалысады. Ақыры осындай өкінішті жайтқа әкеп соғады.
Суицидттік әрекеттер көбінесе қандай жағдайда болады?
Әр баланың мінезі жүре қалыптасады. Кейбір кездері әртүрлі оқиғаға бала жүрегімен беріледі, өзінше қайғырады, содан барып түрліше мінез көрсететін кездері болады.
- Әке-шешенің айрылысуынан, көбіне үлкендердің өз уайымы өздерінде болады, бұл балаға кері әсерін тигізеді, бала осы уақытта кез-келген нәрсені жүрегіне жақын қабылдайды.
- Жақын адамын жоғалту; бала өзіне жақын адамды жоғалтқандықтан, мінезі өзгеріп, уайым пайда болады.
- Отбасындағы кері көзқарас; ұрсу, соғу, жәбірлеу, намысына тиетін сөздер айту, баланың өзін басқа баладан кем сезінуі.
Бүгінде барлық емдеу мекемелерінде жастар мен жасөспірімдерге арналған орталықтар жұмыс істейді. Олар тегін және құпия түрде қызмет етеді.
