Фейк ақпарат дегеніміз не, жалған жаңалықтар қоғам үшін неліктен қауіпті, оны қалай ажыратамыз, әлем елдері мен Қазақстан үкіметі фейк ақпаратпен қалай күресіп жатыр.
Еліміздегі мектеп бағдарламасына да медиасауаттылыққа қатысты пән енгізілуі мүмкін. Оқушыларға арналған медиасауаттылық бойынша тұңғыш оқулық мемлекеттік сараптама комиссиясының шешімімен бекітіліп, білім беру ұйымдарында пайдалануға ұсынылған еді.
Қазақстан Республикасы Білім және ғылым министрлігі жанындағы «Учебник» республикалық ғылыми-практикалық орталығының ресми қорытындысы бойынша, «Оқу құралының мазмұны БАҚ жүйесі мен БАҚ саласы туралы заманауи ғылыми идеялармен қамтылған» делінген.
9-11(12) сынып оқушыларына арналған оқулық, сонымен қатар қазақ және орыс тілдеріндегі мектеп мұғалімдеріне арналған әдістемелік құрал электронды форматта қолжетімді.
Еске сала кетейік, аталған оқу құралы 2020 жылдың соңында ұсынылды. Оқу-әдістемелік кешен АҚШ халықаралық даму агенттігінің (USAID) қолдауымен Internews жобасы бойынша «MediaNet» халықаралық журналистика орталығы» ҚҚ әзірлеген.
Өткен жылы Internews және MediaNet өкілдері Қазақстан Республикасы Білім және ғылым министрімен кездесіп, мектеп бағдарламасына медиа және ақпараттық сауаттылықты енгізу мәселесін талқылаған болатын. БҒМ-ның мәліметінше, Ыбырай Алтынсарин атындағы Ұлттық білім академиясы жалпы білім беретін мектептерде медиасауаттылықты дамытудың алдағы стратегиясын талқыламақ.
