АҚШ азаматтарының көпшілігі фейк жаңалық терроризмнен, расизмнен және климаттың өзгеруінен де қауіпті деп санайды. Бұл – Pew Research Center зерттеу орталығы жасаған сауалнаманың нәтижесі.
Сауалнамаға қатысқан 6000 адамның 50%-і фейк пен жалған ақпаратты Америка үшін үлкен проблема деп атады. Дей тұрғанмен, климаттың өзгеруін 46% адам, расизмді 40%, терроризмді 34% адам үлкен проблема деп атаған.
Сауалнамаға қатысқандардың 68%-і фейк пен «ойдан шығарылған жаңалықтар» адамдардың мемлекеттік құрылымдарға деген көзқарасына әсер етеді деп санайды.
Респонденттердің 57%-і фейк жаңалықтардың пайда болуына саясаткерлер мен мемлекеттік құрылымдар кінәлі десе, 36%-і бұған журналистер кінәлі дейді. Көбі осы мәселені қоғам мен журналистер шешуі керек деп санайды.
Ал 52% адам әлеуметтік желідегі жалған ақпаратты таратуға атсалысқанын жасырмады, дегенмен олардың көбі ақпараттың жалған екенін білмеген.
Сонымен бірге, желіде тек жалған жаңалықтар жариялайтын сайт пайда болды. Сайттың авторы – канадалық химик, МакМастер университетінің түлегі Лекса Грэм.
DNAturned сайты ғылымдағы жалған ақпараттарға арналған. Мұнда күмәнді ғылыми жаңалықтар мен зерттеулер жайлы жазылады. Осылайша Грэм шындыққа жанаспайтын, алайда оқырманның назарын аудартатын мақалаларды көрсеткісі келеді. Бұл туралы massaget сайтына сілтеме жасаған 4tagan.kz ақпараттық агенттігі хабарлайды.
Грэм сайт жасауға үш ай, ал мақалалар жариялауға төрт ай жұмсаған. Кейін химикке тағы он шақты автор қосылып, күмәнді жаңалықтарды әшкерелеп келеді. Алдағы уақытта Грэм ақпараттық видеороликтер дайындамақ. Сайт жасаушылары жалған ақпарат тарататын әріптестерін ұялтып қана қоймай, қоғамның назарын елеулі проблемаларға, оның ішінде жаһандық жылынуға аудартқысы келеді.
