Жалған ақпараттың таралуы қоғамда толқу тудыруы мүмкін. Сондықтан мұндай құқықбұзушылық үшін
айыппұл, шектеу немесе тіпті бас бостандығынан айыру түріндегі жаза қарастырылған. Сонымен қатар, оның шындыққа ешқандай қатысы жоқ екенін біле отырып, жасалған бұрмаланған, жарамсыз, жаңылыстыратын ақпаратты тарату Қылмыстық кодекстің 274-бабы бойынша жазаланады. Айыппұлдар мен басқа жазалардың мөлшері құқықбұзушылықтың ауырлығына және басқа факторларға байланысты.
Айта кетейік, қоғамдық тәртіпті бұзу немесе азаматтардың, ұйымдардың құқықтары мен заңды мүдделеріне және қоғамның немесе мемлекеттің заңмен қорғалатын мүдделеріне елеулі зиян келтіру қаупін туғызатын көрінеу жалған ақпарат таратқаны үшін бір мың АЕК немесе 3 692 000 теңге мөлшерінде айыппұл
түріндегі ең төменгі жаза қарастырылған.
Сондай-ақ, айыппұл сол мөлшердегі түзеу жұмыстарымен, 400 сағатқа дейін қоғамдық жұмыстарға тартумен, бір жылға дейінгі мерзімге бас бостандығын шектеумен
не сол мерзімге бас бостандығынан айырумен ауыстырылуы мүмкін. Алдын ала сөз байласу арқылы өзінің
қызметтік жағдайын пайдалана отырып, бұқаралық ақпарат құралдары немесе телекоммуникация желілерін пайдалана отырып, көрінеу жалған ақпарат таратқан адамдар тобына неғұрлым қатаң жаза көзделген. Байланыс құралдары арқылы жалған хабарламаларды жіберу де телекоммуникация желілері арқылы жалған ақпаратты тарату болып есептеледі. Бұл үшін 3 мың АЕК немесе (11 076 000 теңге) мөлшерінде айыппұл салу не сол мөлшерде түзеу жұмыстарына не 800 сағатқа дейінгі мерзімге қоғамдық жұмыстарға тарту, не үш жылға дейінгі мерзімге бас бостандығын шектеу немесе бас бостандығынан айыру
жазасы көзделген.
Айта кетейік, кейде әлеуметтік желілер мен мессенджерлерде көрінеу жалған ақпарат қана емес,
сонымен қатар алаяқтық мақсатта жіберілетін хабарламалар да таратылады. Бұл Қылмыстық кодекстің
мүлдем басқа бабы. А.Ахметова
