Жалған ақпарат тарату кімді болса да жарға жығатыны белгілі. Оның салдары мемлекетке экономикалық шығын әкеліп қана қоймай, сол ақпаратты таратқан адамның отбасына оңай тимесі тағы анық. Дегенмен осыны біле тұра адам аяғы көп болатын жерлерде «жарылғыш зат қойылды» деген жалған ақпаратпен күштік құрылымдарды да, жұртты да әбігерге салып қою әрекеттері тыйылмай тұр. Осындай «тірлікті» қызық көре ме, әлде өзге де мүдделері бар ма, әйтеуір жалған ақпарат таратушылар да күштік құрылымдардың бас ауруына айналып отыр.
Мұндай жағдайлар елімізді айтпағанда, Түркістан облысында да өзінде де жыл сайын тіркеліп тұрады.
Бәрін тізбей-ақ, яғни соңғы жылдары болған, елдің есінде әлі сақталып тұрған оқиғаларға аз-кем тоқтала кетсек. Түркістан облысы Сайрам ауданының 2 тұрғыны Батыс Қытай — Батыс Еуропа автожолында өткізілген заңсыз автожарысты видеоға түсіріп, митинг өтіп жатқаны туралы жалған ақпарат таратқан.Еске салсақ, бұған дейін желіде Шымкенттегі жанармай құю станцияларының біріне жақын жол бойында ер адамдардың қалың қарасы түсірілген бейне тараған болатын. Роликтің авторы онда бензин бағасының өсуіне қарсы митинг өтіп жатқанын мәлім еткен. Полицейлер видео 12 сәуірде түсірілгенін және трассада автожарыс өткізілгенін айтып, ақпаратты жоққа шығарды.
2020 жылы Түркістан облысында коронавирусқа байланысты жүріп жатқан оқу-жаттығу жұмыстарын ұялы телефонға түсіріп, сол өңірлерде оба тарап жатыр деген мағынада бейнематериалдарды әлеуметтік желілерде таратқандарға қатысты тергеу амалдары жүргізілуде, деп хабарлаған болатын облыстық полиция департаментінің өкілі. Полиция полковнигі тиісті орындардан алынған ресми ақпараттарды жетекшілікке алу, елді дүрліктіретін жалған ақпарат таратпау қажеттігін де ескертті.
Ж.БАҚЫТБЕКҰЛЫ
