Елімізде 2021 жылдан бастап жалпыға бірдей декларациялау жұмыстары жүргізіліп келеді. Бүгінгі күнге дейін бұл реформаның екі кезеңі аяқталып, осы уақыт аралығында 300 мыңға жуық түркістандық салық төлеуші декларациялаудан өткен. Ал, келер жылы үшінші кезең басталғалы тұр. Бұл туралы Түркістан облысы бойынша мемлекеттік кірістер департаментінің басқарма басшысы Мейрамбек Көкенов айтты. Оның сөзіне сүйенсек, ҚР заңнамаларына сәйкес, Салық кодексінде жалпыға бірдей декларациялауды төрт кезеңмен жүзеге асыру қарастырылған.
– Үшінші кезеңде заңды тұлғалардың басшылары, құрылтайшылары және олардың жұбайлары, дара кәсіпкерлер және олардың жұбайлары декларациялаудан өтуге міндеттелген. Ал, 2025 жылғы қорытынды кезеңде азаматтардың қалған санаттары, яғни елдің барлық 18 жасқа толған ересек халқы декларация тапсырады. Декларацияны тапсыру мерзімдері – қағаз түрінде тапсырылған жағдайда әр жылдың 15 шілдесінен кешіктірілмей, электрондық түрде тапсырылған жағдайда – әр жылдың 15 қыркүйегінен кешіктірілмей тұрғылықты жері бойынша тапсырылады. Егер осы мерзім аралығында тапсырмаған жағдайда 15 АЕК көлемінде әкімшілік айыппұл қарастырылған, – деді департамент басшысы.
Оның айтуынша, декларацияны тапсыруда салық төлеушілерге барлық жағдай жасалған. Активтер мен міндеттемелер туралы декларацияны электронды түрде салық төлеушілер кабинеті – cabinet.salyk.kz, «Электронды үкімет» порталы – egov.kz және eSalykmobil, eGovmobile мобильдік қосымшалары арқылы тапсыруға болады.
Б.Мейірханұлы.
