2015-2023 жылдар аралығында Түркістан облысынан жұмыс күші жетіспейтін еліміздің солтүстік өңірлеріне 3555 отбасы, яғни 13 737 адам қоныс аударған. Мұның ішінде 475 отбасы, яғни 1953 адам өткен жылы көшіп барды. Түркістаннан теріскейге қоныс аударғандардың ішінде жаңадан кәсіп ашқандар, кәсібін кеңейтіп үлгергендер де бар. Тұрақты жұмысқа орналасып, күнкөрісін реттеп алғандар да жетерлік.
«Жалпы, «Қуатты өңірлер – ел дамуының драйвері» ұлттық жобасы аясында 2015 жылдан бері Түркістан облысынан солтүстік аймақтарға халықты қоныстандыру жұмыстары тұрақты жүргізіліп, насихатталып келеді. Облысымызда жыл сайын бірнеше рет ақпараттық-түсіндіру жұмыстары мен бос жұмыс орындары жәрмеңкелері ұйымдастырылды. Өңіріміздің белсенді азаматтары да қоныс аударған отбасылардың хал-жағдайымен танысу мақсатында іссапармен солтүстік облыстарға барып қайтты. Олардың айтуынша, бұл жақта едәуір прогресс байқалады. Сондықтан тиісті шаралар одан әрі жалғасады» дейді жауапты мамандар.
Биыл оңтүстіктен солтүстікке қоныс аударуға ниетті азаматтар үшін 7050 квота бөлініп отыр. Өткен жылы 6727 квота бөлінген болатын. Салыстырмалы түрде қарар болсақ, квота саны 554-ке көбейген. 2024 жылы қоныс аударуға әдеттегідей теріскейдің 7 өңірі бекітілген. Солтүстік Қазақстан облысына – 2702, Павлодар өңіріне – 2603, Қостанайға – 950, Шығыс Қазақстанға – 372, Абай облысына – 255, Ұлытауға – 132 және Қарағандыға 36 адам көше алады.
«Мемлекет тарапынан тиісті қолдаулар көрсетіліп келеді. Көшуге ниетті отбасы мүшелеріне бір реттік қаржылай көмек бар. 70 АЕК мөлшерінде және алғашында үй жалдауға қаражат беріледі. Одан бөлек, қысқа уақытқа кәсіби оқуға жіберіліп, жұмысқа орналасу, жеңілдікпен үй алу бойынша шаралар ұйымдастырылады. Соңғы жылдары ұлттық мүддені көздейтін жобаны жүргізуге бірқатар ел жанашырлары атсалысып жатыр. Биыл да бұл бағдарламаны баянды етуге атсалысқысы келетін азаматтардың артқанын қалар едік. Ортақ істен шет қалмай, баршамыз жұмылғанда ғана ісіміз нәтижелі болары анық» дейді облыс әкімінің орынбасары Бейсенбай Тәжібаев.
