Төлеби ауданында 44250 адам жер телімінде кезекте тұрса, 5000 нан астам халық тұрғын үй кезегіне тіркелген. Халықты баспанамен қамту бағытында бірқатар жобалар жүзеге асып, жұмыстар атқарылуда. Қазақстан Республикасы Заңына сәйкес, жер кезегінде тұратындарға жер телімін беру мақсатында соңғы жылдары ауданда жаңа массивтерге инженерлік коммуникация жүйелері тартылуда.
Қазіргі кезге дейін 5 елді мекенде, яғни Көксәйек, Зертас, Бірінші Мамыр, Қаратөбе, Қайнардағы бас жоспарға сәйкес бекітілген аумақ жаңа массив ретінде белгіленіп, 217 га жерге ауыз су, газ құбырлары жүргізіліп, электр жүйелері тартылуда. Құрылыс жұмыстар аяқталғанда 1007 жер телімі беріледі.
Бұл жұмыстарды басқа округтерде жалғастыру бағытында елді мекендердің бас жоспарларына өзгерістер енгізіліп, жаңа массивтерге жерлер қарастырылуда. Аққұм ауылдық округінен Момынай елді мекенінен 341 тұрғынға жер телімін бөлу бағытында 99 га жер қарастырылды.
Бүгін, аудан әкімінің орынбасары Лесбек Серікбаев округ тұрғындарымен кездесіп, жүзеге асатын жобаның мақсатын түсіндіріп, олардың ұсыныс-пікірлерін тыңдап, толғандырған сұрақтарына жауап берді. Жаңа массив шеңберінде жер құқығы бар азаматтарға мемлекет мұқтаждығы үшін, яғни тұрғын үй құрылысы үшін жер қажеттігін түсіндіріп, халықпен еркін форматта пікірлесті. Тұрғындар өз иелігіндегі аз ғана жерлердің халық игілігіне пайдалануға қарсы еместігін айтып, келісімге келетінін жеткізді.
