Бәйдібек ауданы, Мыңбұлақ ауылдық округіне қарасты Қосбұлақ ауылындағы мектепте көркем еңбек пәнінен сабақ беретін Қызжібек Сыздықова гипстен бұйымдар жасап қосымша табыс тауып отыр. Екі жыл бұрын әлеуметтік желіден гипс материалынан түрлі кәде сыйлар жасап жатқан бейнебаянды көріп қызығушылық танытқан.
— Мамандығым көркем еңбек пәнінің ұстазы болған соң гипстен түрлі бұйымдар жасаудың сырын тез үйрендім. Алғашында негізгі ұстаздық жұмысыма кедергі болмау үшін бос уақытымда 10-15 дана түрлі пішінді ақша салатын жәшіктерін жасап, туыстарымның, жолдастарымның туылған күндерінде ғана естелік сыйлық ретінде беріп жүрдім. Жасаған бұйымдарымды әлеуметтік желіге жүктеп, оқырмандарыммен де бөлістім. Қолдан жасалған бұйымдарға қызығушылық танытқандар саны арта түсті. Өздеріңіз білесіздер қазақта сүндет той, бесік той, құдалық, үйлену той және тағы басқа қуанышты күндер көп. Осы тойларға тапсырыс көптеп түсе бастады. Алғашқыда шамалы қорқыныш болды. Қазір тапсырыс қабылдап, «Тойбастар» ретінде қолымнан жасалған түрлі теңге жәшіктерін мерзімінде дайындап берудемін, — дейді Қызжібек Рахматуллақызы.
Мектепте көркем еңбек пәнінің ұстазы болып жұмыс жасайтын Қызжібек Сыздықова бір мамандықпен тоқтап қалмау керектігін дәлелдеп отыр. Өз саласының білікті маманы ретінде бойға жиған бар білімін шәкірттерімен бөлісіп, гипстен бұйымдар жасау ісін қосымша үйретіп, еңбекке, кәсіпке тәрбиелеп отырған шебер ұстаз.
