Қазақстан Республикасы Парламенті Сенатының депутаттары Әли Бектаев, Мұрат Қадырбек және Алишер Сатыбалдиевтар Келес ауданына жұмыс сапарымен келді. Келес өңіріне аяқ басқан халық қалаулыларын аудан әкімі Жәнібек Ағыбаев қарсы алды. Сенторлар аудан әкімі аппаратында жергілікті тұрғындармен кездесіп, өзекті мәселелерге құлақ асты.
Тұрғындармен, қоғамдық ұйым өкілдерімен және аудандық мәслихат депутаттарымен кездесуде Әли Бектаев заңдарға енгізілген өзгерістер мен биыл іске асуы көзделген жобаларға тоқталды. Жиын барысы қатысушылардың сауалдарына жауап берумен жалғасты. Тұрғындар тарапынан аудан көлемінде шешімін таппай жатқан түрлі әлеуметтік-экономикалық мәселелер көтерілді.
Кездесуде тұрғындар өздерін толғандырған Республикалық-15 автожол құрылысын бастау, Біртілек елді мекені аумағынан мәдениет үйін салу, Қошқарата ауылдық округінің Ұшқын елді мекеніне жаңа білім нысанын салу, ауылдық елді мекендерге медициналық пункттердің құрылыс жүргізу және ауылдарды газдандыру жөнінде сауалдарын жолдап, сұрақтарға жауаптарын берді. Сондай-ақ ауыл тұрғындарының ұсыныс-пікірлерін тыңдаған халық қалаулылары кейбір мәселелерге қатысты өз атына хат жолдауды ұсынды.
Сонымен бірге, «Amanat» партиясының Келес аудандық филиалының қоғамдық қабылдау бөлмесінде аудан тұрғындарының өтініштері мен арыз-шағымдары бойынша Қазақстан Республикасы Парламент Мәжілісі депутаты Қырықбаев Темір Базарбайұлы қоғамдық қабылдау өткізді.
Сонымен қатар, қоғамдық қабылдауға облыстық мәслихат депутаты Ағабеков Жаңабай Молдабайұлы, Келес ауданының әкімі Ағыбаев Жәнібек Есенұлы, әкім орынбасары Сүлеймен Жылқыбаев, партия филиалының төрағасы Жұмабеков Ахмет Абдыраманұлы, мәслихат төрағасы Шаулиев Нұржан Бүрлібайұлы, аудандық мәслихат депутаттары және бөлім басшылары қатысып, тұрғындар көтерген мәселелерді жіті талқылады.
Өтініштердің біршамасы республика деңгейінде, бірқатары заңгерлердің кеңесімен депутаттық сұраныс арқылы жауабын таппақ. Қалған сұрақтар аудандық атқарушы биліктің өкілдеріне нақты тапсырылып, оң шешімін табуына атсалысуы жүктелді.
