Бүгін Отырар ауданының әкімі Сәкен Сұлтанханов пен аудандық мәслихат төрағасы Уалихан Ұзақов аудан орталығынан шалғай орналасқан Көксарай, Маяқұм, Балтакөл ауыл округтерінде болып, бірқатар нысандарды аралады.
Алдымен Көксарай ауылы аумағындағы Көксарай-Аққұм бағыты жол бойындағы жарықтандыру мен М.Сеңгірбеков көшесіне аяқ жол салу жұмыстарымен танысып, ауыз су мәселелерін пысықтады.
Бұған дейін ауыл тұрғындары балаларының мектепке барып-қайтуына алаңдайтынын айтып, аяқ жол салу мен жарықтандыруды сұраған болатын. Тұрғындардың өтінішіне сәйкес ұзындығы 1,2 шақырым М.Сеңгірбеков көшесі жарықтандырылып, аяқ жол салынса, Көксарай-Аққұм бағытындағы 2 шақырым жолға жарықтандыру жұмыстары жүргізілген. Жоба аясында 1 дана трансформатор орнатылып, жарықтандыру жұмыстары электр жарығымен толық қамтамасыз етілетін болады.
Аудан басшысы аралау барысында аталған жұмыстардың сапалы атқарылуын бақылауға алуды тапсырып, тиісті мекеме басшыларына нақты тапсырмалар жүктеді.
Мұнан соң Ызакөл елді мекенінің ауыз су құбыры желісінің құрылысымен танысты. 250-ден аса халқы бар Ызакөл елдімекеніне Көксарай ауылының орталығынан 15 шақырым құрайтын ауыз су құбыры тартылып, ауыл тұрғындарын толықтай таза сумен қамту жоспарланған. Сонымен қатар Маяқұм ауылы, Бестам елді мекеніндегі ауыз су құбыры мен ауыз су имаратының құрылысы да аяқталуға жақын. Тұрғындарға таза ауыз су жеткізу күн тәртібіндегі өзекті мәселелердің бірі екенін айтқан аудан әкімі аталған жұмыстардың барлығы бақылауда болатынын жеткізді.
Ынтымағы мен бірлігі жарасқан ауылдардың бірі Балтакөл ауылында көпке өнеге болатын игілікті істер көп. Ауылдың белсенді жастары туған жерді түлетуге атсалысып, елдік мәселені өз күштерімен бірлесіп шешуді дұрыс жолға қойған. Мәселен ауыл азаматтары бірлесіп ауылдың кіре берісіндегі қақпаны жаңартса, осы ауылдың тумасы Полат Еркінбекұлы өз қаражаты есебінен 1,1 шақырым болатын Е.Қалмырзаев көшесіне жарықтандыру жұмыстарын жүргізген. Сондай-ақ ауылдың азаматтары Көлқұдық елдімекеніндегі әлеуметтік жағынан аз қамтылған азаматқа тұрғын үй алып беріп, елдің қуанышын еселеп отыр.
Елдегі берекелі істерді көріп, танысқан аудан әкімі мен мәслихат төрағасы көпке үлгі болған ел азаматтарына шынайы алғыстарын айтып, баспана иесіне тартуларын тапсырды. Шара соңында ауылдық ардагерлер кеңесінің төрағасы Бектемір Алтыбаев елді ынтымағы мен берекесі арта беруін тілеп, ақ батасын берді.
