Жалпы бағдарлама шеңберінде 2023 жылы 1 млрд. 769 млн. теңгені құрайтын 273 өтінім тапсырылса, оның ішінде 1 млрд. 630 млн. теңге сомасына 245 өтінім мақұлданды. 1 млрд. 396 млн. теңгені құрайтын 209 жоба қаржыландырылып отыр. Соның ішінде өсімдік шаруашылығын дамыту бойынша-5, мал шаруашылығын дамыту бойынша-177, құс шаруашылығын дамыту бойынша-4, балық шаруашылығын дамыту бойынша-3, кооперативтерді техникамен жабдықтау бойынша 1 және өз кәсібін ашу бойынша 14 жоба іске асырылды.
Бұл туралы бүгін Түлкібас ауданының әкімі Нұржан Ізтілеуовтың төрағалығымен өткен аппараттық жиында ауылшаруашылығы және жер қатынастар бөлімінің сектор меңгерушісі Абылай Төлепбергенов мәлімдеді.
Жауапты маманның мәлімдеуінше ағымдағы жылы пилоттық жобаға Арыс, Жаскешу, Ақбиік, Кемербастау ауылдық округтері енгізілген. Қазіргі таңда 4 ауылдық округ, кент әкімдері бағдарлама аясында аймақтан ұсынылатын жобаларды дайындауда.
Бұдан бөлек лездемелік жиынның күн тәртібінде қыс мезгілінде коммуналдық қызметтермен қамтамасыз ету және бюджеттің орындалу барысы қаралды.
Басқосуды қорытындылай келе Нұржан Жақсылықұлы «Оңтүстік жарық транзит» мекемесінің аудандық филиалы басшылығын сынға алып, аудан аумағында сәл жел тұрса не себептен электр жарығының өшетінін анықтап, ретке келтіруді тапсырды.
Тіршілік нәрі саналатын ауыз сумен тұрғындарды үздіксіз қамтамасыз ету мақсатында жауапты «Тұраркент-су» МКК-нің жаңадан тағайындалған басшысы Б.Жұматаевқа әр аймаққа арнайы жөндеу бригадаларын бекітіп, жұмысты жүйелеу керектігін ескертті.
Сонымен қатар, аудан әкімі барлық бағыттағы жолдарды қардан тазалау мәселесіне ерекше тоқталып, өзіне жүктелген міндеттерді тиісті денгейде атқармай жатқан мердігерлер мен мекемелерге қар жауған кезде жұмысты күшейтілген режимде жүргізу және техника санын арттыру бойынша хат жолдауды жауапты бөлімге тапсырды.
