Бүгін Жетісай ауданының әкімі Серік Ұсенұлы Мамытовтың төрағалығымен аппарат мәжілісі болып өтті. Жиынға аудан әкімінің орынбасарлары мен қала, кент, ауылдық округ әкімдері, бөлімдер мен мекеме басшылары қатысты.
Мәжілістің күн тәртібінде елді мекендердің санитарлық тазалығы мен кіріс көздерін, табыс салығын ұлғайту, жұмыссыздық деңгейін төмендету мен өткен жылы атқарылған жұмыстарды қорытындылап, алдағы атқарылар жұмыстардың жоспарын, қаланың дамуының бағдарламасының бағытын пысықтау мәселелері талқыланды. Жауапты басшылардың баяндамалары тыңдалды.
Нақтырақ айтар болсақ, аудандық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің басшысы Берік Мамбетов қала, кент, ауылдық округтердегі санитарлық тазалық жұмыстарының жағдайы туралы баяндама жасаса, экономика және қаржы бөлімінің басшысы Өмірзақ Дүйсебаев пен аудандық салық басқармасы басшысының орынбасары А.Ділдәбеков ауданда кіріс көздерін және табыс салығын ұлғайту бойынша атқарылатын жұмыстар туралы, қала әкімі Нұрлыбек Бахтияров пен аудан әкімдігінің ұйымдастыру-инспекторлық бөлімінің бас инспекторы Берік Есалиев Жетісай қаласын дамыту мақсатында атқарылған және атқарылатын шаралар туралы, аудандық «Мансап» орталығының басшысы Олжас Қаныбеков 2024 жылғы қала, кент, ауылдық округ әкімдерімен және басқа да мекемелермен алдағы уақытта біргелікте атқаратын жұмыс жоспары туралы айтып өтті. Атқарылып жатқан жұмыстарға талдау жасалды.
Өз кезегінде аудан басшысы ауданда жұмыссыздық деңгейін төмендету, әлеуметтің әлеуетін арттыру, «Ауыл аманаты» жобасы аясында кәсіпкерлігін қолға алушылар мен жеке инвестициялар есебінен ашылған жаңа жұмыс орындарының санын көбейту, салықтық түсімдер мен бюджет шығысының орындалуын, орын алған кемшіліктерді тез арада жойып, аудан аумағында жұмыс жүргізетін мердігерлердің жұмысының сапасын қатаң бақылауға алуды, қала, кент көшелерінде жабылып қалған арық-атыздар мен су қашыртқыларын қалпына келтіруді тапсырды. Берілген хаттамалық тапсырмалардың орындалуын өз бақылауында ұстайтынын жеткізді.
