Әрбір адамның бойында Алланың берген өнері немесе дарыны болады. Соны дұрыс білсе, өнерлі жан өз орнын табады. Бастысы, оған деген құштарлық сезімі биік болса, алынбайтын қамал болмайды. Ауданымызда осындай өнердің бір тармағы бойына дарыған балғын балапандарымыз, өнерлі жастар, аға буын өнерпаздарымызда баршылық. Қазақ халқының басына өткен сан қилы замандар, оның тіршілігі, салт-дәстүрі, санасы, өмір сүрген ортасы, әдет-ғұрпы арқылы ұлттық өнер ұрпақтан-ұрпаққа жалғасып, болашақ үшін бүгінде тарих сахнасына айналды.
Тарихы бай, табиғаты тамаша Түлкібас өңірінің киелі топырағынан шығып, қазіргі таңда ауданымыздың намысын, облыс, республика көлемінде қорғап жүрген мақтаныштарымыз, жерлестеріміз «Арша» тобының «Өнерім-Өмірім» атты ән кеші Майтөбе ауылында өте жоғарғы деңгейде өтті. Кешті ашып беру үшін сахна төріне Майтөбе ауылдық округінің әкімі Медет Оңалбекұлы, аудандық мәдениет үйінің мәдени және бос уақытты өткізу жөніндегі қызметті ұйымдастыру бөлімінің басшысы Базыл Зәбенұлы сөз алып, бүгінгі кештің жақсы өтуіне сәттілік тілеп, өнерпаздардың өнері бұдан әрі де дами түссін деп ақжарма тілектерін арнады.
Ұлттық киімдер киіп, домбыраларын құшақтап залға еніп жатқан өнерпаздар Үкілі домбыра оркесторы халық күйі «Нәр ағаш» сазды әуенін орындап, концерттің шымылдығы ашылды. «Қазақ деген аттан сүрінсе де, салттан сүрінбеген» халық десек, осы «Арша» тобы сол салттан жаңылмай, жиналған жұртшылыққа құлаққа жағымды үндері мен халық әндерін нақышына келтіріп орындап, мерекелік кеш одан әрі қыза түсті. Одан бөлек аудандық Мәдениет үйінің өнерпаздары өнер көрсетіп, қошеметке бөленді. Майтөбе ауылдық мәдениет үйі қызметкерлерінің ұйымдастыруымен өткен кеш, атап айтсақ дәстүрді дәріптейтін кештің әуезді әннен, дүбірлі домбырадан шабыт алған халықтың дәстүрлі өнерді сағынып қалғаны байқалып-ақ тұр. Ауыл тұрғындарының қошеметі ерекше болды.
Келген көрермендерді бір серпілту мақсатында «Арша» тобына қатысты сұрақтар қойып, дұрыс тапқан тыңдарманға Майтөбе ауылдық мәдениет үйінің атынан сыйлықтар берілді. Қалың көрерменнің есіне сала кетейік, «Арша» тобы 2006 жылы құрылып, 2011 жылы Тұңғыш Президентіміз Н.Ә.Назарбаевтың жеке қабылдауында болып, халық әндерін орындаған.
Келесі сөз Майтөбе ауылдық мәдениет үйінің директоры Жасұлан Қуатбекұлына, Майтөбе ауылдық мәдениет үйінің мәдени іс-шара ұйымдастырушысы Әзімхан Абитұлына беріліп концертті қорытындылады. Жиналған көпшілік те мерекелік көңіл-күймен, өнерпаздарға ризашылықпен тарқасты.
