Жуырда Түркістан облысында «Әжелер алқасының» 10 жылдығына орай өткен «Аялы әже» форумда кентаулық көпбалалы ана, «Алтын жүрек» номинациясының иегері Жұмаш Гүлжаһан Керімбайқызы Гран-при иегері атанды.
Гүлжаһан Керімбайқызы — 1947 жылы 26 ақпанда Шаян ауданы, Майбұлақ ауылында дүниеге келген. Әріпті ауыл мектебінде танып, кейіннен Байжансайда кешкі мектепте оқып білім алады. Біліммен қатар күндіз тігін цехында жұмыс істейді. 1967 жылы Ленгір медицина училищесінің филиалы Кентау қаласында ашылып, сонда қабылданады. Медучилищені бітірген соң қаладағы № 3 емханада медбикелік жұмысқа орналасып, еңбек жолын жалғастырады. Медучилищеде дәріс берген Жұмашов Ысқақ есімді азаматпен отбасын құрып, шаңырақ көтереді.
Қаладағы «Ромашка» балабақшасында зейнетке шыққанша медбикелік қызметін атқарады. 5 баланы дүниеге әкеліп қана қоймай, бойларына білім тәрбиесін сіңдріп өсіреді. Бүгінгі таңда сол бес балалары елдің әр саласында абыройлы қызмет етеді. Дәрігерлер отбасында тұңғыш ұлдары Арман қазір Алматы қаласында, Т.Жүргенов атындағы Қазақ ұлттық өнер академиясында ұстаз, кафедра меңгерушісі, ғалым, профессор. Екінші ұлы Нұржан олда жоғарғы білімді. Қаладағы сурет мектебінің директоры. Қызы Шолпан Ататүрік атындағы № 4 мектеп-лицейінің мұғалімі. Ержан орталық ауруханадағы Жансақтау бөлімінің меңгерушісі. Балжан Астанада УЗИ дәрігері, аурулардың диагностикасын жасауды меңгерген.
