Биыл Отырар ауданындағы Қ.Мұңайтпасов атындағы жалпы білім беретін мектебіне 50 жыл толып отыр. Аталмыш оқу ордасы ауданымыздағы тарихы терең оқу ордаларының бірі де бірегейі. Осы білім ұясы қаншама білімді шәкірттерді тәрбиелеп, үлкен өмірге қанат қақтырды. Бүгінде мектеп қабырғасынан түлеген тұлғалар елімізге шынайы қызмет етіп, ел экономикасының дамуына үлес қосып келеді.
Бүгін атаулы мерекеге орай мектеп базасында «Самғатқан сан қыранды — алтын ұям» тақырыбында аудандық семинар ұйымдастырылды. Шараның мақсаты инновациялық менеджмент және көшбасшылық теорияларын зерделейтін заманауи жабдықталған мектеп базасында жұмысты жетілдіру арқылы оқыту мен сапасын жақсарту. Семинар жиынына аудан әкімінің орынбасары Айдос Құлмаханов арнайы қатысып, мектеп ұжымына ізгі тілегін жеткізді.
Ол өз сөзінде: «Бүгінде заманауи білім дағдыларын меңгерген, әлем тілдерін еркін меңгерген, бәсекеге қабілетті жастарға жан-жақты білім беру басты міндет. Осы бағытта мектептерді материалдық тұрғыда жан-жақты қолдаудың тетіктері қалыптасты. Мәселен, аудан көлемінде 40 жалпы білім беретін мектептің 28-і типтік, 12-сі ыңғайластырылған жайда орналасқан. Солардың ішінде Қ.Мұңайтпасов атындағы жалпы білім беретін мектебі талапқа сай жұмыс атқарып келеді. Қарашаңырақтан қаншама білімді жастарымыз түлеп шығып, еліміздің дамуына үлес қосып жүр. Осы сәтті пайдалана отырып мектеп ұжымының жас өркендерді тәрбиелеудегі өрелі жұмыстарына сәттілік тілеймін!»-дей келе білім ұясында ұзақ жылдар бойы жемісті еңбек етіп келе жатқан ұлағатты жандарға шынайы алғысын жеткізді.
Семинар аясында мектеп ішіндегі жабдықталған атаулы кабинеттердің ашылуы өтіп, күш атасы Қажымұқан Мұңайтпасов атындағы Қазақ күресінен спорттық сайыс ұйымдастырылды. Бозкілемге шыққан жастар кіл мықтылардың арасынан кім мықты екенін анықтап, жеңіс тұғырынан көрініп жатты.
Тағылымды шара одан әрі оқушылардың ғылыми-шығармашылық конференциясына ұласып, «Аңыз бен ақиқат» атты Қ.Мұңайтпасұлы туралы жазылған кітаптың тұсауы кесілді. Осылайша арманшыл ауыл жастарының өмірден кетігін тауып, кірпіш боп қалануына баспалдақ болған қасиетті ордасының 50 жылдық мерейтойы көпшіліктің есінде қаларлықтай деңгейде қорытындыланды.
