Түркістанда 24 қазан – Кітапханашылар күніне орай «Махаббатым кітап, мамандығым кітапханашы» мерекелік іс-шарасы өтті. Алдымен Ашық әкімдікте орналасқан жылжымалы кітапхана пунктінде Түркістан облыстық мәдениет және туризм басқармасының басшысы Әзімхан Қойлыбаев ардагер кітапханашыларды қабылдап, құрмет көрсетті. «Фараб» кіапханасында жалғасқан мерекелік шараға Түркістан облыстық мәдениет және туризм басқармасы басшысының орынбасары Әділ Қонысбеков қатысып, облыс кітапханашыларын кәсіби мерекемен құттықтады.
– Бүгін кітапханашы мамандар үшін айтулы мереке. Кітапхана – біздің рухани құндылығымыз, теңдессіз байлығымыз, өйткені, өткен заман өрнектеріндей тарихты да, әдебиетті де, басқа да ғылым кереметтері осы кітапхана қорынан табылады. Кітапхана – оқырманның рухани талап-тілегін қанағаттантыруымен қатар, әлемдік, ұлттық, әмбебап ақпарат көздерін толық жинақтап, оқырманға жеткізуші. Рухани білімнің, рухани мәдениеттің ордасы ретінде кітапхана ешқашан мәні мен маңыздылығын жойған емес. Түркістан облысына қарасты 396 кітапхананың ұйымдастыруымен өткен биыл ауқымды істер өткізіліп, кітап қоры жиналды. Осы қасиетті қазынамызды көздің қарашығындай сақтап және насихаттап, ел игілігіне жаратып жүрген мамандық иелері – ол кітапханашылар. Баршаңызды кәсіби мерекелеріңіз құттықтаймын, – деген Әділ Нұржанұлы еңбегі еленген бірқатар кітапханашыны министрлік және басқарма, одақ атынан марапат табыстады.
Шара барысында облыстық кітапхана директоры да әріптестерді мерекемен құттықтап, марапаттады. Облыстың барлық кітапханаларынан жиналған кітапханашылар үшін «Махаббатым кітап, мамандығым кітапханашы» тақырыбында кітап көрмесі, инсталляциялық көрме және жетістіктер көрмесі жасақталып, келушілерге таныстырылды. Кітапхана саласының өткені мен бүгіні жайлы бейнеролик көрсетілді. Сондай-ақ мерекеге орай концерттік бағдарлама ұсынылды. Шәмші Қалдаяқов атындағы облыстық филармонияның және Түркістан қалалық мәдениет үйі өнерпаздары кітапханашыларға көтеріңкі көңіл-күй сыйлады.
