Түркістан облысындағы киелі орындарды аралаушылар саны күн санап артып келеді. Саяхаттаушылар санын арттыра түсу мақсатында «Kazakh tourism» ұлттық компаниясының ұйымдастыруымен аптаның әр сенбі-жексенбі күндері Шымкент қаласынан Түркістанға тегін автобус қатынайды.
Туристік автобус — үшінші апта саяхаттаушыларды тегін тасымалдауда. Ақысыз туристік бағыт – көптеген азаматтарға киелі өңірлерді көруге мүмкіндік беріп отыр. Тур аясында ең алдымен саяхаттаушылар тарихтан сыр шертетін Отырар төбе мен Арыстанбаб кесенесіне зиярат етеді. Одан соң туристер Ясауи кесенесі мен көне Түркістан шаһарының заманауи жаңа келбетімен танысады.
Айта кетейік, автобус Шымкент қаласынан әр сенбі-жексенбі күндері сағат 09:00-де «Shymkent Grand Hotel» қонақ үйінің автотұрағынан қатынайды. Автобустан орынды алдын ала https://goturkistan.com/shymkentturkistan сайты арқылы брондауға болады.
