«Біз қарапайым еңбек адамына құрмет көрсетуіміз керек. Қандай кәсіппен айналыссаң да, оны сапалы атқару маңызды. Жастар нақты бір мамандықтың қыр-сырын жетік білуге ұмтылғаны жөн. Өз саласының шеберіне әрдайым сұраныс болады. Өскелең ұрпақ Қазақстанда ғана емес, өзге елдерде де бәсекеге қабілетті болуы керек», деп Президент «Әділетті мемлекет. Біртұтас ұлт. Берекелі қоғам» атты кезекті Жолдауында айтқан болатын.
Келес ауданына қарасты Біртілек ауылдық округі аумағындағы «Asyl qus» шаруа қожалығы 3 мыңнан аса бөдене құсын өсіріп отыр. Жоба 2022 жылы толық іске қосылған. Жалпы құны 16 млн теңгені құрайды. Кәсіпкер бүгінде жұмыртқамен қатар бөдене етін де экспортқа шығарып үлгерген.
— Бұл жобамыз отбасылық кәсіпке айналды. Бұған дейін бірнеше кәсіптерді қолға алып көрдік. Дегенмен, осы кәсіп арқылы табысқа кенеліп отырмыз. Бөденені бастапқыда сатып алсақ, бүгінде өзіміз өндіріп көбейтіп жатырмыз. Күніне 3 мыңға жуық бөдене жұмыртқасын еліміздің ірі қалалары мен облыс аумағындағы аудан-қалаларға жібереміз. Бұдан бөлек, бөдене етін де сатылымға шығардық. Сұраныс жоғары. Үйренем деушілерге арнайы курстар ұйымдастырып, кәсіптің қыр-сырымен таныстырамыз, — дейді «Asyl qus» бөдене құс шаруашылығының директоры Диана Есенова.
Кәсіпкер 9 адамды жұмыспен қамтып отыр. Жұмысшылар мемлекеттік бағдарлама аясында жергілікті тұрғындар арасынан алынған. Қожалық иесі алдағы уақытта кәсібін кеңейтуді жоспарлап отыр.
