Келес ауданы әкімдігінде «Ашық әкімдіктегі – ашық кітапхана» жобасы бойынша Келес аудандық орталықтандырылған жылжымалы кітапхана пункті өз жұмысын бастады. Кітапхананың ашылу салтанатына аудан әкімінің орынбасары Дәурен Сариев, аудандық ішкі саясат, мәдениет, тілдерді дамыту және спорт бөлімі басшысы Дәурен Илесов, мемлекеттік қызметшілер мен кітапханашылар қатысты.
Аудан әкімінің орынбасары Дәурен Сариев кітапхана ұжымының жаңа бастамаларына сәттілік тілеп, «Ашық әкімдіктегі ашық кітапхана» жаңа жобаның оқырмандар үшін пайдасы мен тиімді тұстары жақсы екенін тарқата айтып өтті.
Кітапхана пункті аудандық әкімдік ғимараты аймағындағы бөлмеге орналастырылды. Кітап пунктіне кітапхана қорынан оқырман қызыға оқитын көркем әдебиеттермен қатар сала бойынша оқулықтар да қамтылды. Атап айтар болсақ қазақ әдебиеті классиктерінің шығармалары, көркем әдебиет, психологиялық, тарих, соңғы кезде сұранысқа ие болып жатқан мотивациялық кітаптар, жалпы 1000 дана кітап пен мерзімді басылымдар қойылып, оқырмандардың сұраныстарын толықтыру үшін арнайы кітапханашылар жауапты болып орналастырылды. Оқырмандардың сұранысы бойынша сөредегі кітаптар жаңартылып отырады.
Аталған жоба мақсаты билік пен халық арасындағы байланысқа руханият арқылы дәнекер болу, халықтың кітап оқу мәдениетін қалыптастыру, мемлекеттік қызметшілердің кітапхана қорындағы кітаптарға қолжетімділігін арттыру болып отыр.
